“Villacidro Murgia”: unu licore PAT fatu cun tzaferanu

In sa Mesa - Su “Villacidro Murgia” est unu licore PAT (Produtu traditzionale de Sardigna), unu produtu licantzu chi at un'aromatu de tzaferanu e benit dae Biddacidru; custu licore s'agatat in cummèrtziu dae su 1890. Lu produiat "La distilleria a Vapore del Commendator Gennaro Murgia". Custa realidade produtiva at presentadu su licore - chi at unu colore grogu unu gradu de 40°- in su 1892; L'at fatu cun un'avisu publitzitàriu publicadu in S'"Unione Sarda".

Su “Villacidro Murgia” est una bevida semidurche, chi at su 15% pagu prus o mancu de tzùcaru e 25 aromatos. De custos 25 aromatos feti duos sunt declarados: su tzaferanu e su fenugru. Su tzaferanu rapresentat s'ingrediente chi li dat su sabore caraterìsticu e su colore grogu tìpicu.

Su “Villacidro Murgia” si faghet sighende bator fases, est a nàrrere: sa preparatzione de sa mescra; s'ammisturamentu; s'istajonadura; sa coladura.

Sa preparatzione de sa mescra est sa primu fase de su licore e s'otenet cun alcol de primu categoria "Buon Gusto". S'alcol est comporadu semper suta de su controllu de s'"Ufficio Tecnico di Finanza". A pustis devet èssere sòrbidu cun abba de orìgine granitina leada dae sos territòrios de Biddacidru e de Gonnos, duncas s'annangant: su tzùcaru produidu in Bidd'e Sorris, su tzaferanu de Santu Èngiu e sos àteros aromatos non declarados. Su colorante est costituidu dae s'E124 e dae su tzaferanu.

Concruida sa primu fase, incumentzat sa de duas, est a nàrrere sa fase de s'ammisturamentu. A pustis de àere sordidu su tzùcaru in s'abba, s'aunint sos infusos idroalcolicos e sos infusos in abba.

Duncas, si sighit cun sa fase de istajonadura: in cuntenidores de atzàrgiu inox si ponet sa mescra paris cun s'alcol, s'agiolotat totu e si lassat pasare a su mancu pro unu mese. Posca, s'intrat in sa fase de sa coladura. A pustis de sa coladura su Villacidro Murgia si ponet in ampullas de 0,50 cl, 0,70 cl e de unu litru.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22