"Sardinia Food Awards": in gara belle e 300 aziendas  

In sa Mesa - Su "Sardinia Food Awards" lompent in su 2022 a sa de sete editziones. Sos "Oscar" dedicados a sos produtores de s'agrualimentare ocannu at a bìere in gara belle e 300 aziendas sardas.

Sunt totus aziendas chi ant detzìdidu de afortigare sa calidade e sa sustenibilidade de sos produtos issoro.

Ma ite est su "Sardinia Food Awards"? Comente acrarant sos organizadores etotu, su "Sardinia Food Awards" no est unu cuncursu tècnicu. "In sos annos sa fortza e sa caraterìstica de sos 'Sardinia Food Awards' est istada pròpiu sa de fàghere connòschere una 'mission' pretzisa", est a nàrrere "promotzionare, valorizare, premiare e creare oportunidades de crèschida pro sos produtos de primore de s'ìsula".

Duncas, sos "Sardinia Food Awards" non sunt feti prèmios, ma sunt meda de prus, pro ite cun sos "Sardinia Food Awards" onni azienda at a intrare in cuntatu cun comporadores internatzionales.

In s'editzione colada sas realidades iscritas in sas categorias binu, ògiu, pasta, mele, pane carasadu, casu, salumes, botàriga, durches, sunt istadas 256.

A manera diversa de s'annu coladu, in su 2022 torrat peri sa categoria birra màstrina. Una categoria importante chi in su 2021 est istada lassada pro more de su COVID-19.

No est acabada inoghe. S'editzione 2022 de su "Sardinia Food Awards" at finas unas cantas novidades chi interessant a sos premiados. Sas novidades pertenent a sas categorias. Pro fàghere un'esèmpiu, sa categoria de s'ògiu ocannu at àpidu unu "boom" de iscritziones cun prus de 40 aziendas. Cun custu nùmeru mannu de iscritziones sos organizadores ant detzìdidu de premiare finas sas sutacategorias divididas in: ògiu Ermanu, Dop e Bio. Ma no est totu. Ocannu ant a èssere dados prèmios ispetziales pro pònnere a notu sos produtores minores.

Àtera novidade de su 2022 est su prèmiu ispetziale pro su "packaging" de categoria.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22