Sa pompia in Parigi. Un’oro in su "Prix des Épicures de l’Epicerie Fine"

In sa Mesa - Sa marmellada de pompia de su presìdiu “Slow Food” at conchistadu un’oro in sa categoria “confitures & assimilées” de s’editzione de ocannu de su "Prix des Épicures de l’Epicerie Fine". Un’oro chi pesat, mescamente si pensamus chi sos produtores thiniscolesos de su Panificio Pau l’ant buscadu brinchende·nche àteros duos produtos de primore in cussu cumpartu: sa Préparation Figue Orange Berce de sa Maison Perrotte e s’Ananas Arrangè (Ma tì confiture) de Muroise et compagnie.

Unu resurtu profetosu nou pro custu agrume chi s’est faghende logu comente produtu intre sos prus rapresentativos de sa terra nostra. Custa prenda indeorada, chi cunforma a sos ùrtimos istùdios est agrume fìgiu de su tzidru e de s’arantzu agru (Citrus aurantium X Citrus medica”), est unu frutu chi creschet in tretos baroniesos e, dae pagu, a Thiniscole la mutint comente “tzitade de sa pompia”. Sos impreos suos sunt semper de prus e in sos ùrtimos annos issa est finamentas ingrediente printzipale de unos cantos produtos pro su contivìgiu de sa persone.

Sa pompia, duncas, at fatu sa figura sua in custa editzione de su prèmiu, sa de 9, in intro de su "pavillon Gabriel" inghiriadu dae su birde mancari in su coro de sa capitale frantzesa, serente a sos Champs-Élysées e a pagu tretu dae Place de la Concorde.

Sa manifestatzione est, cada annu, un’atopu de professionistas, de pràticas bonas, de produtziones e de giurados de vàllia. Sa marmellada la faghent dae s’agrume thiniscolesu, finamentas dae sas partes chi non benint impreadas pro s’ammàniu de sa pompia intrea (su durche candidu). Est unu suta-produtu, duncas, ma de calidade manna, cun unu sabore detzisu chi si cojuat bene meda cun su pane carasau o in pare cun regotu o cun casu. B’at de iscummìtere meda pro su bene de su territòriu in ue issa naschet e sa mègius manera est sa de si fàghere connòschere peri su mundu cun eventos che a custu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22