Madalena: Fasi e Slow Food pro s’agroalimentare de primore

In sa Mesa - Est comintzada su 2 de làmpadas, in s’artzipèlagu de Madalena, sa de tres editziones de “Giugno Slow”, manifestatzione in contu de agroalimentatzione chi movet dae sos temas de s’identidade, de s’etzellèntzia e de sa sustenibilidade.

Presente ocannu finamentas su coordinamentu giòvanos de sa Fasi, sa Federatzione de sos assòtzios sardos in Itàlia. Sos rapresentantes giovaniles de sos emigrados sardos sunt traballende cun “Slow Food Gallura”, cun su Comunu de Madalena, cun s’Istitutu Garibaldi, cun “Slow Food Youth Network Sardegna”, cun s’assòtziu “Passu Malu” e cun sos giòvanos madaleninos pro sa bona resèssida de s’eventu. «No est de badas chi custa editzione de “Giugno Slow” est intitulada “I semi del futuro” - at naradu Sara Nicole Cancedda, coordinadora de sos giòvans Fasi -. Semus traballende pro unu setore agroalimentare sustenìbile e de primore in lìnia cun sos valores Slow Food».

In intro de sa manifestatzione ant programmadu una rassigna de tres dies dedicada a sas aziendas de su territòriu regionale e una mustra fotogràfica intitulada “No photo reposare 2021” cun sas mègius tiradas de s’editzione colada.

Pro s’editzione 2022, in programma dae su 4 de trìulas a mesaustu, sos organizadores ant ismanniadu su cuncursu cun sa setzione dedicada a su patrimòniu enogastronòmicu de s’ìsula. Sa punna est sa de propònnere «una narratzione noa - comente afirmat Cancedda - e a tesu dae sos istereòtipos pro contare, cun sa fotografia sa rivolutzione a bellu a bellu in caminu».

A concruos de sa manifestatzione sos imprendidores giòvanos de “Slow Food” ant a èssere protagonistas de un’eventu in lìnia a issos etotu dedicadu pro contare sa realidade e sas esperièntzias issoro. In fines, che a s’editzione colada, s’ant a pòdere comporare sos produtos agroalimentares pro mèdiu de su portale sardatellus.it.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22