Biodiversidade: in Sardigna 12 ratzas autòctonas

In sa Mesa - Pro sa “Die Mundiale de sa Biodiversidade” chi s'est isboligada su 22 de su mese de maju coladu, s'"Associazione Allevatori" de sa Regione Autònoma de Sardigna at ammentadu ca sa Sardigna est una terra de biodiversidades zootecnicas. S'ìsula, difatis, contat sa bellesa de 12 ratzas autòctonas: tres de boes ("Sarda", "Bruno-Sarda", "Sarda-Modicana"), duas ovinas ("Sarda" e "Nera di Arbus"), duas cràbinas ("Sarda" e "Sarda primitiva"), una porchina, duas caddinas (Giara e Sarcidano) e duas de àinu (Sardo e Asinara).

Tocat finas a nàrrere ca pro sa Sardigna custu est unu patrimòniu zootecnicu importante, chi at sa netzessidade de èssere salvaguardadu, e chi abisòngiat peri de una valorizatzione de sas produtziones. A lu nàrrere est pròpiu s'assòtziu “Allevatori”, chi acrarat puru ca sas aziendas chi allevant sas biodiversidades zootecnicas sardas ant tècnicos chi las assistint cando si faghent sas compidadas funtzionales. Custas serbint pro compidare s'istadu de sos allevamentos e su de sas bestias.

Sunt importantes sos datos de s' "Aars", "Associazione Allevatori della Regione Sardegna", chi at rilevadu ca su nùmeru mesanu de boes de ratza "Sarda" est de 25.993 bestias, mentras pro canto pertocat su boe de ratza "Bruno Sardo" est de 34.073 bestias. Pro su boe de ratza "Sardo Modicano" su nùmeru est de 2.253 bestias. Galu, pro su chi atenet sos ovinos, sos de ratza "Sarda" sunt 2.500.000 e sos de ratza "Nera di Arbus" sunt 9.316, sas cabras de ratza "Sarda" sunt 13.299 e sas de ratza "Sarda primitiva" sunt 7.954. No est acabada, pro ite sos porcos de ratza "Sarda" sunt 390, sos "cavallini della Giara" sunt 542 e su "Cavallo del Sarcidano" est presente cun 102 bestias. In fines sunt 380 sos "asinelli dell'Asinara" e 2.980 sas bestias de sa ratza "Asino Sardo".

Su Presidente de "AAR Sardegna" Luciano Useli Bacchitta at ammentadu ca su "sistema allevadores at ativadu duas initziativas importantes", est a nàrrere su progetu LEO, chi est cumentzadu in su 2018 e s'incaminat a realizare una prataforma digitale pro sa zootecnica italiana, un'istrumentu ùnicu isvilupadu gràtzias a s'atividade de AIA, paris cun "partner" de importu comente Universidades, Istitutos Zooprofilaticos e àteros Entes de chirca. Sas fainas sunt controlladas dae su "Ministero delle Politiche Agricole, Alimentari e Forestali" chi rapresentat s'Autoridade de gestione.

Galu, s'àteru progetu est nàschidu pro amparare a sa biodiversidade de sos animales de Sardigna de interessu zootecnico, ma finas pro amparare a s'ambiente in ue bivent. Su progetu est istadu batijadu "Allevamento Custode".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22