In Biddanoa Franca torrat sa “Sagra della Mandorla”

In sa Mesa - In Biddanoa Franca su 15 de su mese de Maju 2022 torrat sa "Sagra della Mandorla", lòmpida ocannu a sa de bintunu editziones.

Paris cun sa sagra, manifestatzione chi faghet festa a unu de sos produtos tìpicos de su territòriu, est a nàrrere sa mèndula, sa bidda de su Campidanu de Mesu afestat finas "Monumenti Aperti" e sa "Festa di Sant'Isidoro", patronu de sos massàjos.

Sa mèndula, s'ischit, est s'ingrediente printzipale de su prus de sos durches de Sardigna, duncas est giustu a la afestare a pustis de duos annos de stop pro more de sa pidemia de coronavirus (COVID-19). 

Sa chi est in programma Biddanoa Franca, duncas, at a èssere una festa manna. Una festa in ue sa protzissione dedicada a su Santu, sa cultura, s'enogastronomia, sos ispetàculos e sas bìsitas ghiadas a sos monumentos de su territòriu ant a èssere sos ingredientes de una die chi at a èssere ammentada comente carca de emotziones.

Domìniga 15 de su mese de maju, sa "Sagra della Mandorla" at a indanimare su tzentru istòricu de sa bidda cumentzande dae sas 9.30, cun s'abertura de sos stand chi ant a espònnere produtos enogastronòmicos. Semper in su tzentru istòricu s'at a isboligare sa manifestatzione "Tradizioni e Antichi Mestieri", a incuru de sa "A.T. Pro Loco Segariu". Durante "Tradizioni e Antichi Mestieri" s'ant a fàghere: su Cocoi pintadu cun sa màdrighe, sos Macarrones de scibiru e sa frègula de Segariu. Galu, s'ant a fàghere finas: iscarteddos, pobinis, crobes, serretas, gurteddos e àteros trastos.

A sas 10.00, in sa "Casa del Soldato Madonna della Salute", at a abèrrere sa mustra batijada "Esposizione fotografica della 1° e 2° Guerra Mondiale", mentras in carrera "Lamarmora" s'at a isboligare su "Tiro con l'Arco e Banchetto Medievale" a incuru de su "Gruppo Medievale Funtana Onnis" de Guasila. Non est totu, pro ite in sos aposentos de sa "Casa Caboni Murru" s'ant a acasagiare adòbios cun sos artesanos, mentras "Da Lorena" e in "Boutique delle Carni" s'ant a agatare màndigos de sa traditzione e màndigos interpretados abbaidende a sa modernidade. Galu, sa die at a sighire cun mùsica, bufòngios, tastos de geladu fatu cun mèndula, ballos sardos e àteru meda.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22