In Tissi sa de XIII editziones de sa “Sagra dell'Asparago Selvatico”

In sa Mesa - Tissi torrat a afestare sa "Sagra dell'Asparago Selvatico", chi in su 2022 lompet a sa de XIII editziones. Sa manifestatzione s'at a isboligare domìniga 24 de su mese de abrile in s'àrea pedonale pratza "Municipale", in carrera "Roma" e in su "Belvedere".

Sa sagra de s'isparau est aprontada dae sa "Pro Loco" de Tissi cun su patrotzìniu de sa Comuna de Tissi, de sa Regione Autònoma de Sardigna e de s'assòtziu "Imago Mundi OdV" de Casteddu.

Tocat a nàarrere ca sa "Sagra dell'Asparago Selvatico" torrat prus rica meda gràtzias a su traballu fitianu fatu dae sa "Pro Loco". S'editzione 2022 de sa manifestatzione, difatis, at a èssere acumpangiada dae un'àteru addòbiu de importu mannu, est a nàrrere dae "Monumenti Aperti". Cun sos tastos enogastronòmicos s'ocasione s'at a presentare apetitoja meda pro su paladu, ma at a èssere apetitoja finas pro s'intelletu cun s'iscoberta de sos logos de s'istòria antiga de sa bidda.

Sa "Sagra dell'Asparago Selvatico" at sa punna - at pretzisadu su sìndigu de Tissi GianMaria Budroni - de elègere s'isparau "a ortalìssia sìmbulu de sa bidda". S'amministratzione de sa comuna, difatis, s'est ingimiriada a traballare pro sa valorizatzione e sa tutela genètica de s'isparu. S'obietivu e su de lòmpere a sa coltivatzione de s'isparau agreste.

Ma cale est sa punna finale? Est sa de passare dae sa collida de s'isparau chi creschet in su sartu a una pianificatzione de sa gestione de sa collida, e peri de sa cummertializatzione e de sa mudadura pro mèdiu de protocollos chi pertocant s'irrigatzione. Totu custu s'at a fàghere pro lòmpere a otènnere sa tzertificatzione DOP, segudende unu livellu de produtzione chi cunsìderat s'isparau agreste un'elementu importante pro s'economia agrìcula.

In sa "Sagra dell'Asparago Selvatico" s'ant a agatare finas "stand" de artesanadu. In su "stand" de sa Pro Loco at a èssere possìbile comporare matzuleddos de isparau friscu. Sos "stand" e sas paradas ant a aberrere a sas 10.00.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22