Promotzione de su pische cun “Aggiungi un pesce a tavola”

In sa Mesa - Est istada batijada "Aggiungi un pesce a tavola", est una campagna de sa Regione Autònoma de Sardigna e at sa punna de imparare a sa gente a mandigare su pische a manera responsàbile.

Su disafiu de sa campagna aprontada dae s'agentzia "Laore Sardegna" - si leghet in sa pàgina de "Sardegna Agricoltura"- est su de "promotzionare su consumu de su piscadu locale chi est valorizadu de mancu" e finas su de promotzionare su consumu "de su pische chi est allevadu in acuacoltura a livellu regionale, natzionale e europeu".

S'initziativa de comunicatzione istitutzionale "Aggiungi un pesce a tavola" - est bene a lu pretzisare (ndr.) - est istada fata paris cun su "Servizio pesca e acquacoltura" de s'Assessoradu de s'agricultura e reforma agropastorale de sa Regione Autònoma de Sardigna.

Sa campagna de comunicatzione "Aggiungi un pesce a tavola" est finatziada dae su "Programma Operativo 2014-2020" de su "Fondo europeo per gli affari marittimi e la pesca" ("FEAMP, Misura 5.68", Medidas in favore de su cummèrtziu). Comente amus atzinnadu, su progetu at s'obietivu de valorizare s'economia chi s'isbòligat a inghìriu de su pische. Pro lu fàghere est netzessàriu ingendrare atinamentu supra sas caraterìsticas de sa pisca sustenibili e de sas cunditziones de sa pisca sustenibili. No est totu. Tocat peri fàghere craresa a pitzu de sa calidade e a pitzu de frischesa de sos produtos de su mare e tocat a creare cussèntzia a pitzu de su rispetu de sas ratzas amparadas.

Pro educare a su rispetu de sas ratzas amparadas bisòngiat educare sa gente a mandigare pische de istajone, piscadu o allevadu a manera currègida. Galu, su pische devet èssere finas de sa mannària giusta.

Sas atividades aprontadas pro su 2022 dae sa campagna "Aggiungi un pesce a tavola" sunt medas e s'ant a isboligare a manera istruturada. Sas atividades sunt ghiadas dae s'agentzia de comunicatzione de Casteddu "37Comunicazione".

"Aggiungi un pesce a tavola" est una campagna chi promovet sa difusione de sos contenutos in su giassu de sa RAS e in sos "social media". In prus, est una campagna chi previdit finas traballos audiovisivos in pitzu de sos mestieris de sa pisca e de s'acuacoltura, unu "press tour" pro iscobèrrere sos territòrios interessados, campagnas publitzitàrias e giogos de sotziedade.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22