Sanidadi: abetenti sa manifesta de su 24 de su mesi cabudanni

S'abisòngiu de torrai a ponni in pei unu sistema sanitàriu pùblicu chi assegurit su diritu a sa saludi fait protestai ancora sa comunidadi sarda. Is ispidalis de totu su territòriu, difatis, funt incaminaus a sufriri un'iscordonamentu giai detzìdiu.

Sa centralizatzioni de is detzisionis in matèria sanitària non donat boxi a is abisòngius de is territòrius. Sa preneta de is ispidalis pùblicus nostrus, de sa sanidadi territoriali e de sa saludi de is sardus non si podit giogai intre diretoris generalis e assessoris. In prus, is nòminas polìticas fintzas a oi funt istètias pagu adeguadas a afrontai unu tema aici cumplicau e de importu mannu comenti su de sa sanidadi.

A faci de s'aspetativa de vida de is sardus, chi s'est abasciendi sèmpiri de prus de diri in diri, e a faci de is datus pagu bellus asuba de sa morimenta, a sa dichiara de su Presidenti Solinas: "Ia bolli ca a is sardus siat acrarau beni ca sa sanidadi no est foras de contu", sa “Rete Sarda" arrespundit arrefudendusì de pigai parti a un'àteru rituali de sa delegatzioni, prevìdiu a s'acabbu de sa manifestada cras su 24 de su mesi de cabudanni. Iat èssiri una cosa inùtili e tocat po finas a nai ca sa situatzioni de sa sanidadi sarda dda connoscit de sèmpiri totu a sa classi polìtica.

Iat essi giustu chi is dossier fatus a sa minuda de sa "Rete Sarda" asuba de sa sanidadi in Sardigna – dossier donaus siat a sa Giunta passada siat a custa Giunta - finisamenti siant lìgius e pigaus in cunsidèriu comenti contributu cuncretu po nci bessiri de sa crisi sanitària e po no isbagliai prus. Est feti asuba de custu assuntu chi in su benidori sa "Rete" at a atzetai cunfrontus.

Claudia Zuncheddu - boxi de "Rete Sarda-Difesa Sanità Pubblica"