“Vitivinicola Atzori”: trèighi ètaros coltivados cun bides autòctonas

* Dae sa terra a sa butìllia * - S'agatat in Crabras e est un'azienda chi produit binos e ògiu. Su sartu contat sessanta etaros de terrinos chi s'agatant in unu territòriu bellu e chi at un balore archeològicu mannu, cun monumentos importantes de edade pre-nuraghesa, nuraghesa, romana, fenìtzia e pùnica.

Semus faeddende de sa “Vitivinicola Atzori”, una realidade produtiva chi, cun una traditzione familiare importante, at su bantu de produire binos de calidade manna.

Intro sos sesanta ètaros coltivados, trèighi sunt pastinados a bides. Sunt feti bides de àghina autòctona: Crannàcia, Cannonau e Nieddera.

Castiende bene a sos passos a dae in antis chi at fatu sa cantina de Crabras podimus nàrrere ca s'istòria de sa “Vitivinicola Atzori” est fata de reconnoscimentos e prèmios importantes, otentus mescamente in sos annos Otanta e Noranta de su sèculu coladu.

Sas prendas pretziosas de s'azienda de sa famìlia Atzori sunt bator, duos binos biancos, unu nieddu e unu rosadu. Sunt una crannàcia “Vernaccia di Oristano D.O.C.”, una crannàcia “Vernaccia di Oristano D.O.C. - Riserva”, unu binu nieddu “Nieddera della Valle del Tirso” e unu rosadu “Nieddera della Valle del Tirso”.

Su binu “Vernaccia di Oristano D.O.C.” est fatu de àghina crannàcia chentu pro chentu. Est una bèvida colore de oro cun reflessos de pinnadellu. Sos nuscos suos sunt prus fortes cando su binu cumentzat a imbetzare, su sabore est echilibradu e at 15 grados pagu prus o mancu de alcol. Custu binu est bonu a lu bufare pro acumpangiare durches de mèndula, casu e petza puru.

Su binu “Vernaccia di Oristano D.O.C. - Riserva” at un'istrutura echilibrada e unu nuscu de flores de mèndula e nughedda. Est unu binu carcu bonu pro acumpangiare durches tìpicos sardos.

Su binu nieddu “Nieddera della Valle del Tirso” est su frutu de s'unione de àghinas Nieddera e Cannonau. Su colore est unu ruju carcu, comente carcu est su sabore suo. Custa bèvida, chi at unu gradu tra 12 e 14, s'acumpàngiat bene cun màndigos de petza.

In fines, su rosadu “Nieddera della Valle del Tirso” est unu binu dìligu chi at sabore de frùtora. Òtimu a lu bufare mandighende pische arrustidu, minestras e supas.