In Tresnuraghes sa “Cantina Angelo Angioi” produit binos bonos e famados

* Dae sa terra a sa butìllia * - Sa “Cantina Angelo Angioi” at un'istòria de prus de chent'annos e at sa domo sua in Triuraghes, una biddighedda in provìntzia de Aristanis a deghe chilòmetros a tesu dae Bosa. Su caminu suo est cumentzadu in s'annu 1907, cando su bisàjiu de Angelo Angioi, chi est su mere atuale, at comporadu sas terras de su Sartu de Coloras. Unu sartu, custu, chi s'agatat in una campeda de calcare, a 180 metros a subra de su mare.

A pustis de s'achistu, in Coloras est cumentzada un'operatzione de bonìfica; posca, pro unu sèculu sos terrinos suos sunt istados coltivados a trigu.

In sos primos annos de su 2000, Angelo at eredadu su sartu dae su babbu, at traballadu sos terrinos e at pastinadu sas bides de Malvasia. Oe custas matas produint sos binos bonos e famados de sa cantina sua.

Sas bìngias de Angelo Angioi sunt allevadas a guyot e onni annu sa binnenna dda faghent durare duos meses, sighende passu passu sa maturatzione de sos budrones de s'àghina.

Tocat a nàrrere puru ca sas bìngias de sa "Cantina Angelo Angioi" ant un'espositzione particulare, in cara a su Golfu de Bosa. No est pro nudda ca sunt tocadas dae su Bentuestu.

Acabada sa binnenna, a pustis de sa catzigadura, sa fase de s'incubonadura si faghet cun sas mègius madrighes ischertadas e durat pro bator meses.

Cun sa punna de otènnere unu produtu de calidade manna, in cantina si còmpidat onni cosa, finas sa temperadura a pustis de s'incubonadura. Posca, sos binos pasant o in carradas de linna o in atzàrgiu.

A sighire sas bèvidas si ponent intro de sas ampuddas.

Dae sas bides allevadas dae sa “Cantina Angelo Angioi” si faghet feti “Malvasia di Bosa D.O.C.”. Semper e cando, custa realidade produit puru binos nieddos “Cannonau di Sardegna D.O.C.” e àteros biancos primorosos comente su “Vermentino di Sardegna D.O.C.”, ma s’àghina de Cannonau e sa de Vermentinu sunt comporadas dae bìngias agenas.

Sos binos Malvasia cun eticheta “Cantina Angelo Angioi” sunt de tres tipos: su “Salto di Coloras Malvasia di Bosa D.O.P. 2014”, unu binu durche e friscu; su “Salto di Coloras Malvasia di Bosa D.O.P. 2013”, una bèvida cun sabores chi regordant sos piricocos, su dàtili e sa figu; su “Salto di Coloras Malvasia di Bosa D.O.P. 2010 – Riserva”, unu binu chi cumprit pro bator annos in carradas de orrole e chi est bonu a lu bufare mandighende durches tìpicos sardos o pipende unu bellu zigarru.

In fines, comente si podet intuire, custa realidade produtiva faghet finas unu Cannonau, su "Scultone Cannonau di Sardegna DOP 2014", unu binu carcu e elegante, e unu Vermentinu, su "Filicario Vermentino di Sardegna DOP 2014", bèvida bona pro acumpangiare màndigos de mare.