Su “Birrificio Alguer” de Uri: unu traballu màstrinu pro fàghere sas birras Dolmen

* Dae sa terra a sa butìllia * - Su nùmene de s'eticheta est Dolmen e ammentat monumentos neolìticos tra sos prus imponentes e ispantosos chi amus in Sardigna. Semus faeddende de sa birra produida dae su “Birrificio Alguer s.r.l”, una realidade brassìcola màstrina chi at sa domo sua in Uri - bidighedda chi s'agatat a bìndighi chilometros dae Tàtari - e chi in sos ùrtimos annos at traballadu bene faghende bèvidas de calidade manna.

S'istòria de custu birrifìtziu est cumentzada in su 2005 in sa biddighedda de sa Nurra intro de unu laboratòriu modernu. Dae cussu momentu a oe su protzessu pro fàghere sas birras Dolmen benit sighidu passu passu: dae s'issèberu de sos ingredientes finas a cussu de sas ampuddas in ue pònnere sas diversas bèvidas produidas.

S'abba impreada pro fàghere sas birras est abba pura chentu pro chentu; sos lùpulos, sos maltos e sas madrighes sunt frutu de una seletzione pretzisa. Totu su chi si faghet intro de su laboratòriu, difatis, at una punna feti: sa chirca de un'echilìbriu giustu tra s'ispuma, s'istrutura, sos nuscos de sos lùpulos e su sabore marigosu de sa birra. Su resurtu est una produtzione de bèvidas chi non sunt coladas e pastorizadas, birras chi costoint sos sabores bellos de sa terra sarda.

Dae su 2017 a su 2019, su “Birrificio Alguer s.r.l” at pòdidu godire de unu finantziamentu de dinari de sa Regione Autònoma de Sardigna pro fàghere traballos de ammanniamentu intro de su laboratòriu in ue si faghent sas birras. Custa est istada un'ocasione importante, pro ite at permìtidu de dare inghitzu a una fase de crèschida de sas atividades de s'azienda de Uri.

Sas etichetas, bèndidas intro de ampuddas o intro de tamburlanas, sunt ses e sunt una prus bona de s'àtera.

Sa Dolmen Pils, chi leat su nùmene suo dae sa tzitade de Pils, at chimbe grados e unu colore de oro, aromas ricos e nuscos de maltos. Sa Dolmen IPA est una birra in istile Ale inglesu, at prus de chimbe grados de alcol e un'aroma de frùtora, mentres sa Dolmen Blanche est una bèvida cun un'ispuma bianca che nie; sa caraterìstica prus importante de sa retzeta sua est ca intre sos ingredientes non ddoe at lùpulos. In logu de custos, difatis, ddoe annanghent spètzias comente su coriandru o su corgiu de s'arànzu. A sighire, sa Dolmen WEIZEN, una birra in stile WEIZEN chi si faghet cun maltos de òrgiu e trigu sena maltadu, una bèvida primorosa, echilibrada, bella frisca, chi at unu colore grogu che s'oro e chimbe grados de alcol. Sa Dolmen ALE, imbetzes, est una birra traditzionale a colore de oro antigu e riflessos de pinnadellu. In fines, agatamos una birra ruja, sa Dolmen Bock, chi apartenet a sa famìlia de sas Lager, chi ant orìgines in sa Germania medievale.

Cale si siat s'ampudda isseberada intre cussas produidas dae su "Birrificio Alguer", su paladu at a godire de una bèvida chi bos at lassare ispantados aberu.