“Azienda Agricola Antonella Corda”: binos primorosos fatos sighende una produtzione sustenìbile

* Dae sa terra a sa butìllia * - At otentu su reconnoschimentu de “Cantina Emergente - Vini d'Italia 2019” dae su Gambero Rosso. Est una realidade vitivinìcola chi at su nùmene de sa mere sua, un'agronoma giòvana e cumpetente. Est s'“Azienda Agricola Antonella Corda”, chi s'agatat in localidade Pranu Raimondo in Serdiana, bidighedda de su Patiolla a pagu chilòmetros dae Casteddu, tzentru agrìculu insertadu in unu territòriu coltivadu a bides, olia e trigu.

S'istòria de custa cantina est ligada a istrintu cun cussa de sa famìlia de Antonella. Sa pitzoca, difatis, pertenet a una traditzione familiare de bingiateris. Gosi, dae sa mamma at eredadu s'amore pro sa terra, dae su babbu cussu pro su traballu. Cando, in su 2010, custa giòvona at otentu sa ghia de s'azienda de famìlia, at comintzadu a pònnere in òpera unu progetu mannu e innovativu: sa realitzazione de una “boutique winery” capassa de produire binos sardos primorosos, bèvidas bonas a rapresentare su mundu de sas terras de su Patiolla.

Su seberu de Antonella Corda est istadu pastinare bides noas coltivende àghinas autòctonas in bìndighi ètaros de terras. Sas bìngias sunt duas: sa de Mitza Manna, coltivada cun Nuragus de Casteddu e cun àghina Vermentinu, e sa de Mitza S'Ollastu, coltivada a Vermentinu e Cannonau.

Una coltivatzione chi sighit passu passu sos printzìpios de sa produtzione sustenìbile, cun atziones programmadas de lota biològica, s'impreu de energia rinnovàbile, ladaminadura orgànica.

Sas prendas chi naschent dae su traballu in bìngia e in cantina sunt binos elegantes meda, bèvidas chi espressant bene sas caraterìsticas de sos sartos de Serdiana.

In die de oe s'“Azienda Agricola Antonella Corda” produit bator ampuddas, una prus bona de s'àtera. Sunt unu “Vermentino di Sardegna D.O.C.”, bèvida chi at sabore de flores e frùtora e est fata cun àghina Vermentinu chentu pro chentu; unu “Nuragus di Cagliari D.O.C.”, bonu meda a lu bufare cun màndigos de mare; unu “Cannonau di Sardegna D.O.C.” chi pasat in carradas de linna e costoit aromas de frùtora rùja, de rosa e de pibireddu biancu e, in fines, un'“Isola dei Nuraghi I.G.T.” chi at unu nùmene bellu, su “Ziru”, binu chi presentat sos nuscos e sos sabores de sas mègius àghinas de su Patiolla.