“Cantine di Dolianova”: un'istòria coperativa rica de premios e reconnoschimentos

* Dae sa terra a sa butìllia * - 1200 ètaros de terras coltivadas a bìngia, bator milliones de ampuddas produidas onni annu e treghentos sòtzios. Sunt custos sos nùmeros de sas “Cantine di Dolianova”, una realidade produtiva nàschida in su 1949 comente coperativa. Un'istòria bella, chi at raighinas in localidade Su Esu e incluit su territòriu de sas biddas de Pàtiolla, Serdiana, Donori, Ùssana e Solèminis.

In setanta annos de istòria, custa coperativa contat s'evolutzione de una realidade vitivinìcola chi in die de oe est sa primu in Sardigna pro produtzione de binos.

Sas bides de sas “Cantine di Dolianova” dda ant pastinadas in sartos chi alternant montrigos bassos meda e terrinos mòvidos in pessu. Sas àghinas allevadas non sunt feti sas autòctonas, ma b'at bides internatziònales puru. Gosi, sos sòtzios de sas “Cantine di Dolianova” produint Cannonau, Mònica, Nuragus, Vermentinu, Nascu, Muscadellu, Sauvignon, Chardonnay e Syrah.

Sos binos Mònica de produtzione de sa coperativa de Pàtiolla sunt bèvidas famadas in totu su mundu de sos binos; sos Nuragus agradant meda a sos espertos; su Muscadellu est una bèvida primorosa e su binu Malvasia est tra is mègius de s'ìsula.

Sas “Cantine di Dolianova” presentant varias propostas de binos. Sa sèrie chi at su nùmene “Linea TOP” costoit s'ispìritu beru de custa coperativa. Est sa colletzione de sos primores, cun nùmenes comente su Blasio, unu Cannonau D.O.C. Riserva; su Falconaro e su Terresicci, duos binos nieddos "Isola dei Nuraghi I.G.T."; su Montesicci, unu Nascu de Casteddu D.O.C. e su Passito, unu Moscadellu chentu pro chentu.

Sa sèrie “Linea HORECA”, imbetzes, est fata feti de àghina ischertada e incluit bèvidas chi acumpàngiant manigos ammaniados dae sos chef. Sos nùmenes sunt poèticos meda: "Perlas", "Prendas", "Rosada", "Arenada" e "Anzena". Sunt totus etichetas ispantosas fatas cun àghina Cannonau, Monica, Nuragus e Vermentinu.

In fines, b'est sa “Linea GDO”, chi incluit sos binos "Dolia", biancos e nieddos; sos "Santesu", cun nieddos, biancos e rosados; su "Vermentino di Sardigna D.O.C." "Naeli"; su "Sibiola IGT" rosadu; su "Moscato DOC".

Sa de sas “Cantine di Dolianova” est un'istòria rica de prèmios e reconnoschimentos: su "Rosada 2018" at bintu sa Golden Medal de sa de XXVI editziones de su Concours Mondial de Bruxelles, su "Prendas 2018" at pigadu sa Silver Medal in sa matessi editzione de custu cuncursu importante. Sunt imbetzes de su 2020 su reconnoschimentu de sos “Tre Bicchieri” de su Gambero Rosso pro su "Terresicci 2014" e su de sa corona “Guida Vini Buoni d'Italia” otentu dae su "Perlas 2018".