“Cantina Madeddu Bosa”: binos saboridos chi espressant bene su territòriu bosincu

* Dae sa terra a sa butìllia * - Sa “Cantina Madeddu Bosa” est sa mama de bèvidas interessantes. Binos friscos e elegantes nàschidos dae sa coja perfeta tra innovatzione e traditzione.

Gràtzias a Franco Madeddu, dae su 1972 Bosa s'est arrichida de una realidade produtiva primorosa. Maddeddu, difatis, at comporadu terras de pastinare a bìngia. Sos terrenos achistados s'agantant in s'àrea de Piani 'e Murtas e oe lompent a èssere sa bellesa de ses ètaros.

Sa cantina fundada de Franco Madeddu est una azienda moderna e acasagiadora, una realidade ispetzializada in sa produtzione de binos nieddos, de binos biancos e de ispumantes. Onni proposta est un'eticheta de calidade manna, chi espressat bene sas caraterìsticas organolèticas de sas bides autòctonas sardas coltivadas: Cannonau, Vermentinu, Malvasia.

Est dae custas bides chi naschent su Giolzi, s'Attitidu, su Managu, sa Malvasia di Bosa DOC e s'ispumante Demisec Malvasia di Bosa. Sas ùrtimas duas etichetas, est a nàrrere sa Malvasia di Bosa e s'ispumante Malvasia di Bosa, sunt fatas feti cun s'impreu de àghina Malvasia coltivada in su territòriu bosincu.

Nieddu che pighe, Attitidu est unu binu Isola dei Nuraghi Rosso IGT chi cheret fàghere torrare a sa mente su Carrasegare antigu de Bosa, chi, comente in sa traditzione antiga, in su martis de agoa est caraterizadu dae su càntigu e dae su prantu de làstima de sas caratzas lutadas, su matessi chi dat su nùmene a su binu e chi li narant Attitidu.
Custa bèvida, fata cun 80% de àghina autòctona e cun su 20% de àghina Cabernet Sauvignon, est unu binu nieddu, istruturadu bene, perfetu a lu bufare mandighende casu istasionadu e petza arrustu.

Semper dae su Carrasegare bosincu lompet su nùmene de su “Vermentino di Sardegna DOC” produidu dae sa Cantina Madeddu: su binu biancu Giolzi, un'àtera figura importante de sa festa. Difatis custa caratza rapresentat sa personificatzione de su Carrasegare chi est acabende. Custu Vermentinu est produidu cun àghina isseberada cun atentzione. Su resurtu est una bèvida elegante, frisca e saborida chi at nuscos crispos e un'istrutura importante.

Su Managu puru est unu binu de sa sèrie de sos biancos. Una bèvida de sabore chi contat sa bellesa de Managu, una de sas costeras prus ispantosas de su Mediterràneu. Custu binu est su resurtu de sa vinificatzione de diversas ratzas de àghina autòctona regorta a manu. Un'eticheta estremada, caraterizada dae nuscos carcos e dae unu sabore friscu e frutadu. Interessante a lu bufare impare a sos manigos de pische e a casu modde.

Fata cun àghina Marvasia chentu pro chentu, sa Malvasia di Bosa DOC est unu produtu fìgiu de s'esperièntzia de bingiateris antigos de sa Pianalza, in ue dae semper si traballat custa ratza de àghina. Custu biancu est caraterizadu dae nuscos crispos de frores de pèssighe e de mela e dae unu sabore licantzu aberu, chi sunt unu cumbidu a lu comporare. Est una bèvida bona pro acumpangiare sos durches tìpicos de sa traditzione sarda.

A serrare custa bella rassigna de binos de sa “Cantina Madeddu Bosa” ddoe at s'ispumante Demisec Malvasia di Bosa, una bèvida nuscosa produida cun su mètodu Charmat. Fata cun àghina Malvasia chentu pro chentu, desemplada pro acumpangiare onni tipu de durche, custa eticheta at nuscos dìligos de frores biancos. In buca lassat unu bellu sabore fine e amàbile, friscu e minerale.