Su coronavirus po is malàdius de ischirru

S'Adig Sarda, “Associazione per il Diabete Infantile Giovanile - Regione Sardegna”, impari cun su Cordinamentu de totus is assòtzius de is malàdius de ischirru in Sardigna at mandau una lìtera a s'Assessorau a sa Sanidadi de sa RAS pedendiddi de donai atentzioni a totus is malàdius de ischirru, prusàtotu in custu momentu fertu de s'apretu coronavirus.

S'ischirru, difatis, abisòngiat de controllus fitianus. Po custa arrexoni, sa telemexina abarrat s'ùnicu mèdiu de agiudu po chini tenit custa maladia. S'ùnicu chi oi podit donai amparu chentza fai andai is malàdius de ischirru in is ispidalis.

Cun custu cunsidèriu S'Adig Sarda pedit a s'Assessorau a sa Sanidadi de ativai unu serbìtziu de tele-assistu po totu is personis fertas de ischirru, mannus e piticus chi siant. Difatis, su tele-assistu in domu at a permìtiri de fai controllus a sa glicemia, de agiustai is dosis de insulina, de giai consillus a is malàdius chi tenint prus dificultadis asuba de sa cosa ce papai.