Sa Malvasia primorosa de s'azienda F.lli Porcu de Mòdolo

* Dae sa terra a sa butìllia * - Una bìngia coltivada feti cun àghina Malvasia e una terra de duos ètaros in localidade Su e Giagu. Est su chi est serbidu a s'azienda F.lli Porcu pro cumentzare a produire binos in Mòdolo, biddighedda probiana a Bosa, in sa Pranarza.

Fiat su 1971. Don Giuseppe Porcu aiat comporadu terras egadas. Sos bisos suos fiant su de pastinare bides de Malvasia cun unu sistema de allevamentu a guyot e su de fàghere torrare a domo sos frades suos disterrados a Isvìtzera.

Sa de s'azienda F.lli Porcu est duncas un'istòria chi aunit sa traditzione de sa coltivatzione de sa Malvasia, chi at raighinas fortes in su territòriu, cun su disìgiu de innovatzione e sos balores de sa famìlia.

Est gosi ca in su 1975, a pustis de bator annos de traballu, Giuseppe, paris cun sos frades Giovanni e Angelino, cumentzat sa regorta de s'àghina cun sa primu binnenna.

Su 1977 est s'annu sinnadu dae sas primas ampuddas cun eticheta F.lli Porcu.

A pustis de unos cantos annos, s'azienda lompet a àere bator ètaros de terra coltivada feti a bide, ma sa cosa prus importante est ca dae su 1972 sa cantina de Mòdolo faghet parte de su “Albo D.O.C. dei vigneti” e at una produtzione de sessanta cuintales de binu pro onni ètaru de terra.

Sa binnenna si faghet a manu semper in su mese de cabidanne. Posca, su mùstiu, resurtu de sa catzigadura, imbetzat pro duos annos intro carradas de castàngia de treghentos litros.

Su produtu finale de custu traballu est unu binu bonu de sapore e de calidade manna meda.

Oe sa cantina F.lli Porcu produit tres bèvidas diferentes: su binu “Malvasia di Bosa – Riserva Secco”, una bèvida chi at unu sabore sicu e durche e ammentat su de sas mèndulas; su binu “Malvasia di Bosa – Dolce”, una bèvida a sabore de frùtora, elegante e fine meda, e su binu “Malvasia di Bosa – Amabile”, s'ùrtimu nàschidu dae sa passione de sa famìlia Porcu.

Unu binu bonu e una possidètzia ispantosa. Su sartu in ue sunt prantadas sas bìngias de sos frades Porcu est difatis unu logu bellu meda a lu bisitare. In prus de su paesàgiu “pintau” cun sos colores de sa bide, in Su e Giagu s'agatant una cantina istravanada, unu fràigu mannu treghentos metros cuadros, e una cresiedda fata fraigare dae Don Giuseppe Porcu chi costoit cun òperas de arte de valore.