Luna Lughente, binos tìpicos de si lìnghere sas lavras

* Dae sa terra a sa butìllia * – Sa de sa cantina Luna Lughente de Nuradda est un’istòria de famìlia, chi pro mèdiu de sa bide e de s’àghina contat nuscos e sabores de unu territòriu, su Sarcidanu.
Un’azienda de primore, chi naschet dae sa reforma de sos terrinos. Unu nùmene interessante, su de custa realidade produtiva: unu nùmene chi faghet riferimentu a sos sistemas de coltivatzione de sa bide e a sa traballadura de su binu, chi ammentant su mètodu antigu de osservatzione de sas fases de sa luna e de s’efetu chi issa at subra de totu sa natura.

Est dae inoghe chi s’aportzeddat s’idea de avalorare unu produtu chi est sìmbulu e coro de sa terra de Sardigna e de sa bidda etotu: de sa gente de Nuradda e de sas traditziones suas. In tames, totu custu est istadu possìbile gràtzias a unu territòriu chi est caraterizadu dae su clima mediterràneu, duncas dae unu clima perfetu pro s’allevamentu de sa bide, mescamente de su Cannonau, est a nàrrere de sa bide autòctona de su territòriu. Est pro custu puru chi sa cantina Luna Lughente produit binos de calidade manna.

Terrinu, clima e traballadura sunt sos tres alleados mannos de custa realidade produtiva, chi faghet feti propostas chi sunt su resurtu de mètodos de traballadura de s’àghina antigos e modernos.

Luna Lughente est sa mama de tres binos Cannonau chi sunt istravanados: su Lùndaras, su Coloru e su Nannai.

Lùndaras est unu Cannonau de Sardigna DOC, unu binu nieddu càrrigu e istruturadu. Una bèvida bucante, frutu de una binnenna fata a manu e de un’incubonadura a temperadura controllada chi permitit de cunservare ìnnidos sos nuscos e sabores tìpicos de su Cannonau.

Coloru, imbetzes, est unu binu fatu feti cun sos mègius budrones. Una bevida bucante e de sabore, chi bidet sa lughe posca de 15 meses dae sa binnenna. Unu binu chi, a pustis de àere acabbadu de buddire, si ponet in carradas de castàngia; in fines est iscolomadu in sas ampullas in ue pasat pro ses meses, unu tempus importante pro li dare s’istrutura chi lu caraterizat.

Nannai est unu binu chi at totu sos sabores tìpicos de su Cannonau. In antis de èssere bèndidu sunt netzessàrios 24 meses de pasu. Su resurtadu est una bevida licanza e nuscosa, unu binu chi at un’istrutura importante e unu sabore de si lìnghere sas lavras e chi aturat in buca.