Audarya: un'azienda serdianesa famada pro sa produtzione de binos chi faeddant de su territòriu

*Dae sa terra a sa butìllia* - Unu brand chi est imbassadore de sa manera moderna e traditzionale de fàghere su binu in Sardigna. Semus faeddende de Audarya, s'azienda de Serdiana chi produit bèvidas de primore.

Unu nùmene importante. Audarya, difatis, in una limba orientale antiga significat ànimu bonu. Bonu comente est s'animu istravanadu de custa realidade produtiva chi at pigadu su respetu comente motore de onni faina.

Audarya produit binos fìgios de bides autòctonas chi faeddant de su territòriu. Produtos modernos chi abbàidant semper a sa traditzione.

S'azienda ghiada de Salvatore e de Nicoletta cun s'agiudu de su babbu Enrico s'agatat a curtzu a Su Stani Saliu, logu chi at una fera galanosa e rica meda.

Serdiana est famosa pro sa produtzione de àghina e sos sartos suos sunt sa domo de sas bator bìngias aziendales: Audarya, Acquasassa, Su Stani, Is Crabilis.

Sas bides de custas bìngias sunt prantadas a 150/200 metros de artària e sas espositziones sunt istadas istudiadas pro favorèssere una crèschida sana de sas matas.

Totus sas bìngias ant unu terroir ùnicu. In prus, sunt basadas dae s'àera de mare chi lompet dae su Golfu e chi dat caraterìsticas ispetziales a s'àghina.

A pensare a sas bides sunt Salvatore e Enrico acostagiados dae sos coltivadores de sas bìngias de Serdiana chi dae semper traballant cun sa famìlia.

Sa cantina cun sas cubedinas de atzàrgiu e de tzimentu, sa sala de sas carradas, sa de imbotilliare e s'enoteca, s'agatant in sa possidèntzia Audarya, chi cun sos 7 ètaros de terra suos est su coru de s'azienda. Sa bìngia est pastinada in unu terrinu de tuvu e de lugiana a 200 metros de artària. Inghiriada dae unu paesàgiu meravigiosu, custa bìngia est fata de bides Cannonau, Muristellu, Vermentinu e Malvasia.

S'azienda de Serdiana at duas sèrie de binos: sos de sa “Linea Audarya” e sos de sa “Linea Selezione della Cantina”.

Vermentino, Nuragus, Rosato, Monica e Cannonau sunt sas propostas de sa “Linea Audarya”, mentras Camminera, Nuracada, Estissa e Bisai sunt sas bèvidas de sa “Linea Selezione della Cantina”.

Onni eticheta est unu binu sardu primorosu, un'iscoberta nuscosa e saborida chi dat sodisfatzione e chi agradat a chie la bufat.