Tenute Dettori: una cantina sarda chi faghet binos ispantosos

* Dae sa terra a sa butìllia * - Sunt binos naturales sena tzulfarosa, fermentàrgiu e madrighes. Semus faeddende de sas bèvidas produidas dae sas “Tenute Dettori” de Sènnaru, una bidda in provìntzia de Tàtari. Pro èssere pretzisos sos sarmentos s’agantant in localidade Badde Nigolosu.

Sa cantina Dettori est una realidade mastrina chi produit binos originales e territoriales in sos sartos de sa Romangia.

Alessandro Dettori, mere de s’azienda, rapresentat sa renàschida e sa revesa a foras de sas modas de sa bide e de su traballu in bìngia. Istimadore de Alex Podolinsky, mastru de sa biodinamica, Alessandro afirmat ca su binu est s’espressione prus pura e berdadera de sa terra. Dettori guvernat cun garbu sas bìngias suas in unu fundale largu e a una bella cantina istuvucada totu in su montrigru e chi s’agatat in suta de su terratzu de s’agriturismu Kent’Annos (propriedade de sos Dettori etotu).

Sas bides de s’azienda ispantant pro sa bellesa issoro. Sas matas, pesadas a prantone, sunt betzas meda (sa prus antiga est unu Cannonau de su 1883) e sos giuales faghent de guarnissa a su Golfu de S’Asinara.

Cannonau, Pascale, Monica e Muristellu, Vermentinu e Muscadellu sunt sos sarmentos tìpicos protagonistas de binos de terroir chi faghent meavìgia. Onni traballu in bìngia no impreat produtos chìmicos e est isboligadu a manu.

In sas cantinas Dettori ddoi sunt feti bartzas de tzimentu e carchi cuntenidore de atzàrgiu chi est impreadu petzi cando si aunint sos binos. Sos buddimentos ispontàneos sunt frutu de su traballu de sos fermentàrgios indìgenos.

Pro sos Dettori sa parte prus bella de sa produtzione est pònnere su binu in ampuddas, difatis totu su traballu est fatu a manu, a manera mastrina.

Sos binos Dettori faeddant cun craresa de sa cara mediterrànea e de s’ìsula de Sardigna. Sunt bèvidas ùnicas e cun unu gradu de alcòlicu importante, perfetas pro las bufare cun màndigos chi ant sabores càrrigos. Totus sas etichetas ant nuscos de mare e de terra chi no si nde connoschent àteros.