Sos binos Chessa: una cultura antiga chi s'aunit bene cun sas tècnicas noas

* Dae sa terra a sa butìllia * – Semus in su Cabu de Susu de Sardigna, in su coro de su Logudoro. Sas terras traballadas a bìngia apartenent a sos sartos de sa bidda de Ùsini, chi at unu terroir ùnicu pro more de su clima e pro sas caraterìsticas de sos terrinos suos. Pròpiu inoghe sa coltivatzione de sa bide at una parte de importu mannu in sa massaria.

Dae prus de sessanta annos in custu territòriu naschet e creschet sa bide de sas cantinas Chessa, s’azienda chi produit binos chi ant nuscos e sabores desemprados.

Sos de Chessa sunt binos tìpicos, su frutu perfetu de una cultura antiga chi s’aunit bene cun sas tècnicas noas. S’azienda faghet binos nòdidos: Vermentinu; Cagnulari (su binu autòctonu chi at arriscadu un’iscumparta e oe bivet su beranu suo), e Muscadu puru.

Sas terras in ue sunt coltivadas sas bìngias de Chessa s’agatant in unu territòriu a 250 metros subra de su mare, sos terrinos sunt calcàreos e sa bide at trinta o baranta annos pagu prus o mancu.

Pro carchi generatzione sa famìlia Chessa at coltivadu sas bìngias suas sena de si mudare in cantina, est a nàrrere ca sos bingiateris bendiant su binu in domo a sos clientes chi bi lu comporaiant. Dae su 2005, imbetzes, sa produtzione de sos binos si faghet in sas Cantinas Chessa.

De onni manera, in antis e a pustis de sa produtzione in cantina, s’istòria de sos binos produidos dae sa famìlia de sos bingiateris usinesos at semper àpidu una punna feti: fàghere binos tìpicos, chi apant raighinas fortes in su territòriu suo e potzant mantènnere arta sa calidade de s’eticheta Chessa.

Sos resurtos primorosos sunt duncas arribados pro more de una produtzione sighida passu passu: dae su traballu in su sartu, cun s’incuru de sos fundos de sa bide, finas a cando su binu si ponet in intro de sas ampuddas.

Gasi sunt nàschidos sos primos tres fìgios de sas Cantinas Chessa: Cagnulari, Mattariga e Kentales. A sos primos binos s’est annantu luego su de bator: su binu Lugherra. Custos sunt totus nùmenes de sos binos chi ant otentu prèmios e reconnoschimentos de importu mannu in sos cuncursos enològicos prus interessantes de su mundu.

Su Cagnulari est unu “IGT Isola dei Nuraghi”, unu binu ruju bellu firmu chi s’acumpàngiat bene cun sa petza e cun totu sa coghina de terra tìpica sarda.

Su Mattariga est unu biancu DOC a colore de grogu pagu cotu e lughente meda, est fatu cun àghina Vermentinu chentu pro chentu. Mattariga est unu binu bonu pro acumpangiare sos pratos de pische.

Su Kentales est unu binu Muscadu a colore de oro e est produidu cun àghina chi est su frutu bene cumpridu de matas de bide chi ant a su mancu chentu annos. Kentales est unu binu nàschidu pro lu bufare cun sos durches tìpicos de sas licàntzias traditzionales sardas.

Su Lugherra est unu ruju “Isola dei Nuraghi IGT” chi naschet dae àghina autòctona Cagnulari e Cannonau. Unu binu carcu e cun unu sabore elegante meda.

A custos nùmenes bisòngiat de annànghere a su mancu su Vermentinu C’era una volta, unu binu nou chi arrichit sa Cantina usinesa cun unu produtu particulare meda.