In sa “Cantina Arvisionadu” pro iscobèrrere nuscos e sabores de Gotzèanu

* Dae sa terra a sa butìllia * –  Sa “Cantina Arvisionadu” at leadu su nùmene suo dae una ratza de bide autòctona sarda millenària. Arvisionadu est una casta antiga de bide a àghina bianca chi est coltivada in su territòriu de Benetutti, sa bidda costerina in ue su clima e sos terrinos nde favoressent sa crèschida.

Su mere de custa cantina est Pinu Mulas, chi tenet sas bìngias suas a curtzu de sa Domu de Jana de Luzzana, unu repertu archeològicu chi est antigu a su mancu ses mìgia annos e est de importu mannu pro sos istùdios subra de sa Sardigna antiga.

S’azienda de Pinu Mulas est nàschida cun sa punna de avalorare s’àghina Arvisionadu, unu frutu chi costoit sos nuscos e sos sabores de sa Costera. Difatis, su territòriu de custa regione de Sardigna est su prus a tesu dae su mare e puru pro custu motivu sos frutos de sa terra, comente sos binos, ant caraterìsticas dislindadas.

Sighende s’obietivu de torrare a avalorare custa bide autòctona, a su costàgiu de Mulas traballant àteros professionistas medas: enòlogos e espertos de iscièntzia agronòmica.

Sas terras de Luzzana non sunt coltivadas isceti a bìngias de àghina Arvisionadu, difatis una parti de sas tancas produit Cannonau e Cagnulari, sas àghinas de duos binos nieddos tìpicos sardos. In prus, in s’azienda agrìcula si coltivant duas ratzas internatzionales puru: Sangiovese e Syrah.

Sas terras coltivadas a bide dae custa cantina de Benetutti sunt dòighi moes e mesu (chimbe ètaros). Intre custas, sete moes e mesu (tres ètaros) de bìngias produint binu biancu Arvisionadu.

In s’azienda de Pinu Mulas onni momentu de sa coltivatzione de sa bide – dae s’incuru de sos terrinos a sa pudadura, dae s’iscartzadura a sa binnenna - est fatu respetende s’ambiente. Pròpiu pro custas resones sa “Cantina Arvisionadu” at otentu su tzertificadu de produtzione biològica.

In su tzentru de sa tanca b’est sa cantina, in ue si traballant sos produtos de sa terra impreende impiantos modernos meda. Sunt machinàrios chi serbint pro s’incubonadura e sa cumpridura in carradas de atzàrgiu e barriques. In prus, durante totus sas fases de sa produtzione de sos binos si còmpidat semper a sa temperadura de sos produtos traballados.

Torrende in dae segus in su tempus, s’istòria de custa cantina est interessante meda. Difatis, sa primu bide de Luzzana l’ant pastinada in su 1950, ma lis est tocadu de isetare finas a su 2010 pro bìdere sas primas ampuddas cun eticheta de sa Cantina Arvisionadu e a su 2014 pro bìdere sa primu ampudda de binu G’Oceano, sa bèvida produida cun sa bide autòctona chi at donadu su nùmene a sa cantina.

Dae su 2016 pròpiu s’eticheta G’Oceano e G’Oceno Sennore ant cumentzadu a otènnere reconnoschimentos de importu mannu. Intre custos, sos de su Decanter World Wine Award, otentos in su 2016, in su 2017 e in su 2019, sas 5 Star Wines in su 2017 e in su 2019, e su Bellavita Award in su 2018.