Altea Illoto, binos biològicos de calidade

* Dae sa terra a sa butìllia * – Su nùmene suo est presente in sa lista de sos binos cussigiados dae sa “Guida vini di Quattrocalici”. Semus alleghende de sa cantina de Altea Illotto, chi in sas pàginas de custu manuale est presentada comente una de sas cantinas prus interessantes in su Cabu de Giosso de Sardigna.

Custa realidade produtiva, difatis, s'agatat in sa bidda de Serdiana, intro de unu territòriu in ue sa coltivatzione de sa bide est una parte de importu de sa massaria. Est inoghe ca Maurizio Altea e Adele Illotto coltivant un’àghina chi est presa a istrintu a su logu suo; e est semper inoghe ca agatamos sos binos Sibiola IGT, chi naschent in sas terras de sas comunas de Serdiana e Solèminis ebbia.

Nàschida in su 1993, custa cantina est su produtu de s'aficu de Maurizio e Adele, ambos espertos de iscièntzia agronòmica. Dae sos istùdios e dae sa cumpetèntzia issoro est andada in antis s'idea de coltivare sa bide respetende s’ambiente. Pro custa resone, giai bintisete annos a oe sa coltivatzione de Altea e Illotto fiat de tipu biològicu e in onni fase de sa produtzione sos bingiateris de s'azienda no impitaiant e no impitant produtos chìmicos chi faghent reatziones tra issos.

Annotamala, totus sos momentos de sa produtzione finas a arribare a sa regorta de s'àghina sunt compidados. Sa binnenna est fata a manu in cassas minores istampadas e sos budrones sunt isseberados a fine. Gasi sos frutos de su traballu fatu in sas bìngias podent arribare in cantina in sa mègius manera: sanos e intreos. In s'incubonadura impreant isceti madrighes autòctonas e naturales.

Maurizio e Adele no ant consulentes dae foras e sa bèndida de sos binos est gestida dae issos e totu. Si podet nàrrere ca totu sa produtzione de Altea Illotto est mòvida dae sa boluntade de produire binos chi espressant s'amore issoro pro su territòriu e su rispetu pro s'ambiente.

Gasi sunt nàschidos binos de calidade: su primu binu de sa cantina, Altea Bianco, nche l’ant produidu in su 2000 cun Nascu, Vermentinu e Nuragus; su Altea Rosso est produidu cun àghina Cannonau, Carignanu, Mònica e Muristellu; su Papilio est fatu dae su 2013 cun àghina Nuragus betza de sessanta annos e su binu In Fundo naschet cun una base de àghina de Muscadu sardu regorta a trigadiu.