Tenute Sa Conca: s'àrbore, su frore e su sole pro unu binu de una cantina galana

* Dae sa terra a sa butìllia * - Est nàschida a pustis de sa gherra de su '15-'18. Fiat difatis su 1919 cando Loe Contu aiat pastinadu una bìngia in sa Conca. Sa cantina gadduresa “Tenute Sa Conca” s'agatat a sud de su Limbara, in su territòriu de Belchìdda.

Su nùmene de custa realidade de bingiateris dipendet de sas rocas de granitu in-ue sa famìlia Contu aiat coltivadu sos fundos de sa bide.

Cun dòighi mois e mesu de terra (chimbe ètaros) arados intro de unu sartu bellu meda, inghiriadu de fundos de murta, modditzi e lidone, “Tenute Sa Conca” faghet binu Vermentinu de calidade.

Dae su 1919, in pagu tempus sa cantina gadduresa at cumentzadu a fàghere faeddare de sos binos suos, mescamente de su primu chi at produidu: su Vermentinu Loe.

Sa de sas “Tenute Sa Conca” est un'istòria de crèschida e de amore pro sa terra e sos frutos suos; difatis cussa de su Vermentinu Loe est un'eticheta de Vermentinu “superiore”.

Sos primos tempos de sa faina, sa famìlia Contu produiat in antis pro sos amigos ebbia, pustis pro sa bidda e sas biddas a pagu tretu. Dae sos annos Noranta, pustis de tres o bator generatziones de bingiateris, est incumentzadu su cummèrtziu de su binu Loe, cun sas ampuddas e un'eticheta elegante e bella meda, in-ue si podent bìere sìmbolos de sa cultura sarda: s'àrbore, su frore e su sole, elementos chi s'agatant in sos documentos istòricos e archeològicos de sa Sardigna.

Oe in sas bìngias de Sa Conca s'agatant ratzas diferentes de àghina Vermentinu. Difatis su seberu de s'àghina est istada una fase de importu mannu pro sa produtzione de binos de calidade. Dae custa diversidade est nàschidu su Vermentinu “superiore”.

Bisòngiat a nàrrere puru ca sa produtzione de Sa Conca est controllada semper, pro ite non depet propassare mai su lìmite màssimu de sessanta cuintales de àghina onni duos mois e mesu de terra (un'ètaru).

Sas ampuddas chi sa Cantina “Tenute Sa Conca” faghet onni annu sunt sa bellesa de trèighi mìgia.