In Parigi cun s'Unesco “La Musique, la Culture, Les Traditions d’une ile dans la Mèditerranée: La Sardaigne”
Image
(IlMinuto) – Casteddu, 6 de su mesi de maju - Sa Sardigna in Parigi, abia de unu arreconnoscimentu a Patrimòniu de s'Umanidadi de s'Unesco, aghillit po sa primu bia, a faci de s'imprenta internatzionali e de is personalidadis de s'arti, de is istitutzionis e de s' ecunumia de Frantza, is launeddas. Su 15 de su mesi de maju chi benit is launeddas de Luisi Lai ant a oberri s'avenimentu de importu “La Musique, la Culture, Les Traditions d’une ile dans la Mèditerranée: La Sardaigne”, e ant a inaugurai su concertu de gala de is star de sa mùsica clàssica, ocannu a sa de seti editzioni sua. Unu mamentu de importu mannu abia de s'arreconnoscimentu de is launeddas comenti Patrimòniu de s'Umanidadi, fillu de un'isfortzu nou po sa cultura fatu de s'Assòtziu "Sardegna in Musica" e de s'Acàdemia Internatzionali de sa Mùsica de Casteddu, nàscia aintru de s'assòtziu e chi de un'annu est formalmentii partner de s'Unesco, gràtzias a s'aprètziu arriciu po su valori de is fainas de didàtica musicali e de promotzioni culturali de sa Sardigna a s'èsteru fata de Cristian Marcia, contertista connotu e maistu de ghitarra a su conservatòriu Chopin de Parigi, e diretori artisticu puru de is propostas, e de su fradi Giuanneluca, presidenti de s'assòtziu. "Disigiaus ca fiamenti bengat arreconnota una grandesa internatzionali a is launeddas" - afirmat Cristian Marcias – e ddu fait cun s'iscopu de artziai su simbolu de is traditzionis musicalis de s'ìsula a dignidadi acadèmica prena, mòviu de unu bisu mannu: su chi una diri o s'àtera is launeddas bengant imparadas in is iscolas e in is conservatòrius de mùsica. S'avenimentu, in d-unu contestu de importu internatzionali, promovit is ischisòrgius de s'artesanau de s'ìsula, poita previdit puru una mostra fotogràfica, una de s'artesanau musicali e is butegas-cuferèntzias innoia s'istrumentu de sa traditzioni musicali at a essi fabricau in su logu etotu de sa mostra de s'Unesco, chi registrat pagu prus de 6milla presètzias a sa diri. S'atopu at essi puru un'avenimentu licantzu, chi a s'acabu de su concertu, in sa "Salle Restaurant" de su de seti pranu de s'Unesco, at a cumbidai a is aproviaus in unu viàgiu interessanti aintru de is saboris de s'ìsula “Voyage dans les saveurs de la Sardaigne”. "Sa mùsica est capassu de oberri dògnia eca - pretzisat Giuanneluca Marcia - e s'Unesco, gràtzias puru e is editzionis passadas de is gala, s'est innamorau de sa Sardigna e bolit investiri in sa dieta mediterrànea e in sa coxina sarda. Po custu s'at pediu de aprontai unu cursu de coxina sarda po su chef cuisinier suu e po is assistentis suus. Si ant a pigai su determinu de insertai is prodotus sardus in su menù iant a podi nasci bagas po s'export de s'agroalimentari de s'ìsula"
Fotografia de Tuzii Fabrizio. Pigada de Flickr
Fotografia de Tuzii Fabrizio. Pigada de Flickr
© RIPRODUZIONE RISERVATA