Militarizatzioni: Sis-Ma: no a su fàbricu de is F35 in Sardigna
Image
(IlMinuto) – Casteddu, 11 de su mesi de martzu - Isburratzada de is esercitatzionis militaris e no scéti de custas, palestra e fabrica de armas, sa Sardigna at essi s'industria de is 54 carrellus de is "cacciabombardieri" F35, chi ant essi fabricaus in Cabu Santu Laretu. A ddu fai isciri unus cantu de cidas fait, atressu de is pàginis de su cotidianu s'Unioni Sarda est Giorghi Zappa, giai diretori de Finmeccanica, oi a sa ghia de Vitrociset, chi traballat in su campu de is tennologias de s'informatzioni e de sa comunicatzioni e in sa "logistica". S'azienda s'interessat de is sistemas eletrònicus e informaticus in su campu tzivili e militari po impresas, aministratzionis pùblicas, agentzias de su guvernu e organizatzionis. Ma fadeus unu passu agoa e torraus a su cuntratu firmau su 14 de su mesi de fiàrgiu passau intre sa Vitrociset e sa Lockheed Martin, azienda chi traballat in is cumpartus de s'inzenneria "aerospaziale" e de sa defesa, aintru de su programa Joint Strike Fighter. Su progetu est fatu in coperatzioni intre is Istadus Unius e àterus otu partners: su Regnu Uniu est partner de primu livellu. Comenti is Istadus Unius cun d-una cuota de investimentu in s'isvilupu de su programa de su 10% s'agat s'Itàlia, impari a s'Olanda, partner de segundu livellu cun d-una cuota de investimentu in s'isvilupu de su programa de su 3,8 – 3,9% - Galu Canada, Turchia, Australia, Norvegia e Danimarca funt partners de terzu livellu cun d-una cuota de investimentu in s'isvilupu de su 1-2%. Sa fabrica de is carrellus de is "cacciabombardieri" F35 s'at a ponni in motu intre su mesi de arbili e su mesi de maju benientis, e dognunu de is 54 carrellus at a costai sa bellesa de 15milionis de eurus. In càmbiu de ita at essi torra isburratzau su territòriu sardu? Sa Sardigna - afirmant is militantis de "Sinistra indipendentista sarda – Movimento anticapitalista" - "est stètia cumcambiada cun sa promissa de 40-50 postus de traballu". Si Zappa at declarau a s'Unioni ca "no depeus perdi nimancu un'iscàmpiu e aprontai s'opositzioni a custu àteru progetu de morti". "Sa gherra a su colonialismu - sighint is indipendentistas - est [...] po primu cosa resistèntzia a sa polìtica de militarizatzioni de su territòriu". Est po custa arraxoni ca Sis-Ma si est fasia de oi etotu "a contribuiri a s'organizatzioni de sa mobilitada populari po pediri sa frimada fuliosa de su contratu Lockeheed Martin-Vitrociset e otèniri su stop de su fàbricu de is 54 carrellus de is 'cacciabombardieri'"
© RIPRODUZIONE RISERVATA