Elìgius 16 delegaus. Sighit sa martza de su Fronte Unidu Indipendentista

(IlMinuto) – Casteddu, 15 de su mesi de ladàminis - Is seti assembreas de su Fronte Unidu Indipendentista sboddiadas domìnigu passau in totu s'ìsula ant elìgiu cun spiritu democràticu 16 delegaus chi s'ant a atopai intru de pagus diriris in assembrea natzionali. Participaus e arricus de arrexonus e de propostas is seti atòbius, chi ant incarrerau giai is puntus de su programa asuba de su cali at a traballai su Fronte, e chi, candu at a benni aprontau, at essi presentau a su pòpulu sardu. Su Fronte indipendentista at biu giai s'adesioni de pastoris, artesanus, massajus, operàjus, imprenditoreddus, istudiantis, maistus, impiegaus, disimperaus, sindacalistas, intelletualis e membrus de is comitaus tzitadinus. Cun is traballus de domìnigu "funt stétias trassadas - si ligit in su Comunicau n° 1 firmau F.U.I. – is lìnias generalis de unu programa chi diaderus est nàsciu de bàsciu, capassu de rapresentai unu sceberu democràticu beru a su decadessimentu e a sa 'desertificazione' de s'ecunumia e de sa cultura de su popùlu sardu". Po sa primu borta difatis - pretzisat sa nota de imprenta - "indipendentistas e tzitadinus, cun esperiéntzias diversas ma alentaus de sa matessi responsabilidadi istòrica de salvai sa pròpriu Terra de su decadessimentu, ant ghetau is fundamentas de unu movimentu de liberatzioni natzionali diaderus democràticu". Prus a tradu a fini de cida is 16 delegaus territorialis chi ant a costituiri s'Assembrea Natzionali de su Fronti Uniu Indipendentista, s'ant a atopai po scriri una primu ordidura cumpleta de programa trassau de is assembreas provintzialis, e po eligi puru is boxis chi ant a tenni su còmpitu de tenni is comunicatzionis cun is media.

Fotografia de Fabiu Cocco