A sa XXVII editzioni "Atopus de Música Populari"

(IlMinuto) – Casteddu, 5 de su mesi de paschixèdda - Est aprontau de su grupu folk Onnigaza po sàbudu 8 de su mesi de paschixèdda s'avenimentu "Atopus de Música Populari 2012", chi lómpiu a sa XXVII editzioni s'at a isboddiai in sa Turri Aragonesa de Ilàrtzi a cumentzai de is 16.30. S'atóbiu di ocannu at tenni po títulu "Sonos de festa" e at essi dedicau a su raportu intre música e festa in Sardigna. Contestus e vàrias espressionis, traditzioni e innovatzioni, mudamentus e paticipatzioni ant essi is allegas isvilupadas in su merì. S'intentu est su de donai una mirada a is espressionis musicalis traditzionalis analizendi música 'strumentale' e cantu, e profundendi is contestus siat profanus ca sacrus. E galu, s'at a atinai asuba de su divulgamentu de sa música traditzionali e asuba de is contestus de impitu de istrumentus musicalis particularis. Aintru de s'atopu s'ant a marcai puru is raportus chi ddoi funt in Sardigna intre is músicas de traditzioni orali e is festas. Documentus audius e videu originalis ant a agiudai is chi ant a participai a cumprendi comenti dógnia avenimentu festivu tengat is músicas suas, e in su mantessi mamentu comenti is músicas arrenèscint a cualificai is tretus e is logus de sa festa. Reladori de s'atopu at essi s'entnomusicologu Marco Lutzu, professori in s'Iscola di Etnomusicologia de su Cunservatoriu de Casteddu innoia imparat Circa in su Campu e Zenias e formas de sa Música Traditzionali in Sardigna.

Fotografia de Fabrizio Tuzii. Pigada de Flickr