Sardigna, s'ísula innoia sa presonia at a diventai un'elementu caraterísticu

(IlMinuto) – Casteddu, 5 de su mesi de totussantus - "Cun s'obertura de is Istitutus Penitentziàrius nous, sa Sardigna at a biri aumentai galu de prus su númeru de is tzitadinus privaus de sa líbertadi. Ant a aumentai de seguru aici is discumbénius e is apinnicus po totus". Est cantu afirmat Maria Grazia Caligaris, presidenti de s'assótziu Sotzialismu Diritus e Reformas, candu annotat ca "s'ísula, castigada meda po sa cunditzioni de disimpreu e discumbéniu sotziali, no minescit de patiri un'impeoramentu de su pesu de sa tzerachia penitentziària puru,po mori de s'Istadu. Una tzerachia custa chi s'aciungit a cussa militari giai meda grai". "Is presoneris in Sardigna, - pretzisat Caligaris - in pagu prus de un'annu, ant a lompi [...] a 4mila preséntzias". Un'afirmadura chi si podit avreguai si castiaus a sa situatzioni de is presonis sardus, aundi podeus biri ca in su presoni de Tèmpiu is 29 postus de s'istrutura funt diventaus 150. In su penitentziàriu de Uda ddoi ant essi asumancu 550 postus, sa galera de Nùgoro, cun su padiglioni nou restaurau de pagu, est passada de 252 a 349 postus, intre duus mesis imbecis, candu at essi intregau S'Istitutu de Bancali, ddoi at essi logu po àterus 430 personis. In Santu Srebastianu su númeru regulamentai furiat de 190. Galu, in Aristanis s'at a passai de 92 postus a 250. Intre is datus furnius de sa Presidenti de Sdr no funt incluius is presoneris in 41bis chi, scéti in s'istrutura de Uda, ant a depi essi unas centina. S'ària chi si respirat in s'ísula, de custu parri puru, no amostat de essi una de is mellus: "S'atinant difatis - concluit Caligaris - singialis cuntràrius a su 'reinserimento' sotziali, a su recúperu e a sa 'rieducazione' de chini at faddiu e custu si portat a atuai  asuba de sa calidai de sa democratzia".

Fotografia de antonio. Pigada de Flickr