Salvatore Usala: is 16.00 "custa est s'ora de sa morti mia"

(IlMinuto) – Casteddu, 19 de su mesi de totussantus - At a tucai custu merì Salvatore Usala, acumpangiau de pobidda e de duus agiudantis. Puntu de arribu: Roma. At a pigai sa nai po si presentai a is 9.30 de mérculis 21 de su mesi de totussantus a petus de su Ministériu de s'Ecunumia, in bia XX Cabudanni. Usala de su 2004 est malàdiu grai meda de Sla, e de sa nàscida sua, est sa boxi de s'Assótziu 16 totussantus. Mérculis chi benit at a abetai de essi aghilliu de is Ministrus po sciri scedas asuba de su dinai chi su Guvernu iat a depi indiritzai a sa "non autosufficienza". Po is màladius grais funt difatis stétius impegnaus scéti 200milionis, tzifra chi afligit a una chistioni grai meda, chi pertocat a dexinas de migliaris de famílias. "No si ndi fadeus nudda de sa limúsina insoru, cussus 200milionis po is malàdius 'non autosufficienti' chi s'ant propostu funt una bregúngia e un'afrenta" afirmat Usala, chi ananti de s'agràbiu chi ddu bit protagonista impari a is àterus malàdius grais meda afirmat. "Si sa situatzioni no si sblocat, a is 16 no totrru a carrigai is baterias de is istrumentus chi mi faint abarrai in vida. Ddu iu promítiu e ddu fatzu. Nos sardus teneus unu fueddu scéti". Un'atzioni de protesta grai. Is sortis de s'ómini funt acapiadas a su Guvernu e a is fortzas chi ddu acotzant. "Teneis su poderi de vida e de morti - arremaciat sa boxi de s'assótziu 16 totussantus - una pistola callenti puntada in su coru miu e de totus is malàdius". E sighit "Apu donau órdinis pretzisus, no eus a tzerriai nimancu a s'ambulàntzia de agiudu, si no cumprendeis ca nos gherraus po sa vida no eis cumpréndiu nudda".

Fotografia de centrifuga. Pigada de Flickr