"Is istudiantis no funt sordadeddus": in Aristanis sighit sa lota de is istudiant médius
(IlMinuto) – Casteddu, 30 de su mesi de totussantus - Lompit de su Colletivu de is istudiantis Antoni Gramsci su tzérriu de furriada destinau a is collegas de su Benedetto Croce e de su Mossa-Brunelleschi. Is piciocus de su Colletivu difatis, cumbidant a totus is istudiantis de su Litzeu Linguìsticu e de is Isciéntzias Umanas e is de s'Istitutu Ténnicu Comerciali e po Geometrus-Nauticu-Aeronauticu-Turismu-Sirio "a no pòniri menti a is tzircularis internas fatas connosci de is próprius dirigentis iscolasticus". "Is documentus, iscritus in 'burocratese' e cun tonus ameletzosus - si ligit in d-una nota de imprenta - funt una dichiara política crara" Is giòvanus protagonistas de sa protesta in faori de s'iscola pública afirmant determinaus ca no est beru ca is istudiantis firmant a is fainas didàticas, e pretzisant ca chini no aderit a s'"autogestione" est líberu de sighiri is letzionis. Cun fortza is istudiantis afirmant de no bolli furriai is ruolus aintru de is iscolas e de no tenni nisciuna intentzioni de ndi liai s'arrespetu a is professoris, cun is calis, antzis, comenti acontessit giai in àterus istitutus, si bolit creai unu traballu mannu: "nos si boleus - pretzisant - ponni in d-unu ruolu 'paritetico' candu s'iscopu est fabricai, de protagonistas berus, s'iscola chi boleus". A is Dirigentis su Colletivu Antoni Gramsci amentat ca s'artículu 4 coma 4 de su Istatuto de is Istudiantis narat: "In nisciunu casu podit essi punia, ni inderetura, ni in manera indireta, s'espressioni líbera de opinioni manifestada cun corretesa e chi no faii dannu a sa personalidadi de is àterus", e po custu acrarant: "est netzessàriu amentai ca is santzionis no podint essi assignadas po sìisceberu líberu de pigai parti a una protesta. [...] "Impitai is santzionis comenti arma de castigamentu ponit làcanas a su sceberu líberu de is istudiantis comenti personis e tzitadinus e noxit a su printzipiu costitutzionali de su 'pluralismo' e de sa libertadi di espressioni". Cun totu chi, in sa tzitadi di Aristanis is protestas sighint. Is piciocus de su Litzeu De Castro ant fatu difatis 13 notis di ocupatzioni, in is iscolas professionalis sighit s'"autogestione", mentras in su ténnicu 2, in su ténnicu 1 e in is Magistralis sa protesta benit mandada ainnantis a tzuculitu po mori de is amaletzus di auséntzia ingiustificada, intima e suspensioni de parti de is dirigentis iscolasticus. Is istudiantis de su Litzeu issentíficu e de s'Istitutu industriali ant a detzíderi in assembrea si ocupai is istitutus insoru.
Fotografia de Cau Napoli. Pigada de Flickr