Traballu: su scrillitu disisperau de is ex traballadoris de Canabi 40

(IlMinuto) – Casteddu, 3 de su mesi de ledàminis - Funt passaus giai duus annus de candu Cabali 40, sa tv de su Surcis Igresienti, at serrau is batentis ponendu in càscia de integratzioni is dipendentis suus. "Po annus meda - acrarat Paolo Mocci , unu de is traballadoris de Canabi 40, in d-una nota pubricada in su social network Facebook - seus stétius sa boxi de is operàjus in lota, de is disimperaus e de is famílias insoru. Si seus agataus a su costau insoru in is assembreas de fàbrica, in is corteus de protesta, in is gallerias ocupadas, poita una testimónia, candu totus si furriànt po no castiai su chi andàt mali, est un'óbrigu dópiu a dda donai". agoa sa crisi at tocau Canabi 40 puru, est lómpia sa serradura, e cun issa sa càscia de integratzioni po is ses traballadoris chi ant mandau ainnantis s'emitenti. A faispaciai s'atividadi funt stétius una fibera de aerrus fatus de àterus: contus faddius de s'Inps po su 2011 e aerrus aziendalis chi ant portau a is ex dipendentis de sa tv de su Surcis Igresienti a no biri de su mesi de totussantus de su 2011 nimancu un'euru de su mesi.

Is ex traballadoris de s'emitenti ant difatis pérdiu su diritu a sa Cigs ("Cassa Integrazione Guadagni Straordinaria") po su 2012. Abandonaus de s'azienda e de is istitutzionis, "oi - si ligit in sa nota - agoa de dexi mesis e prus chentza de agiudu, nimancu pitiu, seus a s'apuria". "S'intendeus cassintegraus e in pagus fueddus tzitadiunus de série B [...]; po custa arrexoni eus imbiau una dinúntzia a sa Diretzioni regionali e a Diretzioni territoriali de su Traballu, a manera chi avreguint natura e arrexoni de s'acontéssia mala meda chi seus bivendi"

Fotografia de Smeerch. Pigada de Flickr