"S'Iscola Nostra no est in Béndida". Manifestada de is istudiantis in Aristanis

(IlMinuto) – Casteddu, 8 de su mesi de ledàminis - No si faint intimorigiai de is aciocus patius cida passada de is cullegas de istúdiu is istudiantis de Aristanis, ca prus arrabiaus de primu, cenàbara 12 de su mesi de ledàminis ant portai in pratza su discumbéniu insoru. S'atopu est in pratza Roma a is 9.30. "Eus a cabai in pratza po si ndi torrai a pigai totu cussu chi s'ant negau, po si ndi torrai a pigai su diritu a essi tzitadinus ativus, a podi sceberai a solus aundi ita istudiai chentza de si depi afidai a sa marolla a is famílias nostras, po si ndi torrai a pigai is iscolas nostras oràmai in is manus de is privaus, po segai is cadenas chi si distinant a unu tempus benidori dudosu e precàriu". Est s'abóxinu de dabori firmau de su Colletivu de is Istudiantis Antoni Gramsci de Aristanis, ca aderit a sa manifestada natzionali promòvia de s'Unioni de is Istudiantis fadendusì aprontadori de sa manifestada chi at a animai sa tzitadi de is Arborea. Est unu corpu malu, su patiu de s'iscola pública, chi in su tempus benidori suu no bit scéti su proliferai de tàglius nous impostus de sa spending review. Comenti acrarant is istudiantis in d-una nota de imprenta, difatis -"est stétia torrada a propòniri sa lei 953, s'ex Pdl Aprea, chi decretat s'intrada de is privaus in is iscolas, apocat a is rapresentàntzias de is istudiantis e sa partecipatzioni e insertat is critérius batacollaus meda invalsi comenti mesura de avaloramentu po su stistema iscola, po is istudiantis e is maistus". "Intendeus asuba de is pabas nostras - cumentant is istudiantis - un'insullu istóricu; intendeus su pesu de annus e annus de políticas ausentis, e de iscassa partecipatzioni". S'agataus duncas a faci de giòvanus chi bolint fàbricai unu sceberu de isvilupu e bolint essi protagonistas de su própriu tempus benidori arramaciendi a boxi arta de essi s'impulsu forti de unu cambiamentu chi partit de asuta, una tramuda chi depit inghitzai de is iscolas, de is bixinaus e de is tzitadis.