In apróliu in Sardigna 50% de is presoneris 41 bis. Zuncheddu s'ísula "àteru muntronaxu de arrefudus ispecialis e perigulosus"

(IlMinuto) - Casteddu, 18 de su mesi de ledàminis - "Conturbanti is dichiaras de su Síndigu Tendas de Aristanis chi bint in s'importatzioni in Sardigna de is presoneris 41bis e de sa criminalidadi oraganitzada, una resossa po s'ecunumia nostra". Est cantu denuntziat sa Consillera indipendentista de SardignaLibera Claudia Zuncheddu in d-una nota imprenta de su 15 ledàminis passau. A sa Sardigna funt difatis destinaus prus o mancu de su 50% de is presoneris 41 Bis. Est custu un'àteru "arregalu" chi su Guvernu Monti fait a s'ísula. "Un'àtera borta - cumentat Zuncheddu - s'Istadu italianu betit in sa terra nostra sa criminalidadi peus chi tenit, creendi in is territórius interessaus possíbilis intraduras mafiosas in s'ecunumia nostra e in sa sotziedadi nostra giai arrematada de sa crisi económica. Custus fenómenus de penetratzioni criminali in sa realidadi sarda funt stétius giai denuntziaus e avreguaus de sa mantessi Magistradura, in su Nord-Est de s'ísula, e no scéti ingunis". S'agataus no solu ananti de unu regimi chi ndi liat sa dignidadi a su presoneri sardu in abetu de giudítziu o cundennau, chi subracarrigat su discumbéniu de is famílias sardas e de is abogaus, contra a su printzípiu de sa territorialidadi de sa pena, chi difatis po podi biri a su presoneri depint andai in sa penísula. S'agataus a faci de unu sistema chi negat su diritu de is presoneris sardus de passai sa presonia in sa terra insoru. Cotra a is custu assisteus a s'intrada in ísula de sa criminalidai prus mala, chi ponit in arriscu mannu a sa seguresa de su pópulu sardu. Est custu - sighit su segretàriu de SardignaLibera - un'"àteru atacu a sa Soberania de is sardus". Un'atacu chi depit essi blocau, concluit Zuncheddu: "Is rapresentàntzias prus artas de is istitutzionis de sa Ras, depint intervenni a manera chi is motzionis aprovadas de su Consillu asuba de sa territorialidadi de sa Pena e asuba de s'istitutzioni de su Fiantzeri de is presoneris, fintzas a oi ignoradas, bengant aplicadas. Su Presidenti Cappellacci, in calidadi de Presidenti de sa Sardigna, si depit fai fiantzeri de su disdeni de is sardus e fatzat presenti a Monti e a is ministrus suus ca su territóriu sardu no est fasiu a essi un'àteru 'muntronaxu de arrefudus ispecialis e perigulosus' de sa criminalidadi internatzionali e italiana".

Fotografia de Rim_shot (0,5). Pigada de Flickr