Sa protesta de is opàjus de sa Italcementi. Sa solidariedadi de aMpI

(IlMinuto) – Casteddu, 20 de su mesi de cabudanni - Ant a perdi su traballu in atóngiu is duus opràjus de sa Italcementi chi ariseru a manginu si funt apicheddaus in su cùcuru de su seu de Tàtari po fai sciri a totus de sa contienda insoru. Su 14 de su mesi de totussantus, difatis, at a finiri sa càscia integratzioni po is 19 traballadoris de s'ex fàbrica de ciumentu de "Scala di Giocca" ai custu mamentu serrada. S'impresa donada traballu a 30 traballadoris in totu, 11 funt stétius mandaus in àterus impiantus. Is operàjus in protesta pedint s'atuatzioni de unu protocollu po essi insertaus in fainas de "riqualificazione" de su tretu impitau de Italcementi. In acotzu a is traballadoris de sa Sardigna de tramuntana a Manca Pro s’Indipendentzia espressat luegu sa própriu solidariedadi apogendi totalmenti su slogan de su cartellu: "No boleus assistu, boleus traballai". "Mentris sa classi política italianista - afirmat sa nota de imprenta de sa manca indipendentista - arrexonat asuba de is alleàntzias po is regionalis e narat isciolórius apitzus de su 'sovranismo', is traballadoris sardus si funt ordingendi po dirigi in deretura s'ísula e po lissentziai a is partidus e a is partideddus acapiaus a s'Itàlia chi ant fatu su desertu e ddu ant lamau progressu". Comenti membru de sa Consulta Rivolutzionària, duncas, aMpI cumbidat a is operàjus de sa Italcementi e s'"uniri a sa Consulta de is traballadoris e a portai su cuntributu insoru po s'amaniada de sa manifestada manna chi s'at a isboddiai in Casteddu".

Fotografia de zanzibar. Pigada de Flickr