Raffaele Curreli, mortu de industria chímica aMpI: ""Espressaus totali solidariedadi a sa família e a is amigus"

(IlMinuto) – Casteddu, 24 de su mesi de argiolas - Raffaele Curreli, ex operàju de Otzàna, est mortu a 57 annus scéti, po mori de unu de is mostrus prus malus chi impestant sa Sardigna: s'industria chímica. S'ómini at spaciau de bivi po mori de unu cancru a is prumonis arregalu de su postu de traballu suu. Un'ómini corazosu, Raffaele Curreli. E ddu at amostau candu at detzidiu de denuntziai publicamenti su felenu a su cali beniant e benint sutapostus is traballadoris de su repartu At04 e At05. Curreli "est stétiu lassau a solu de is partidus e de is sindacaus italianus, conis de s'avelenamentu de operàjus e de comunidadis intreas sderrexinadas de is vocatzionis naturalis de traballu insoru, po essi abandonadas in su desertu económicu e in s'impestadura de sa terra e de s'ària" , afirmat cun d-una nota de imprenta a Manca pro s'Indipendentzia. "Su tempus at cumprovau - sighit su comunicau - su chi de sèmpiri sa manca indipendentista denuntziàt, est a nai s'insustenibilidadi de su modellu de custu tipu de industria in su territóriu nostru chi at ingrussau is capitalistas e s'istadu italianu arregalendi poberesa a is comunidadis nostras e destrossendi a s'ambienti nostru".