Unu "Tzentru de sa Soberania económica": su scioberu de aMpI a sa caserma de Pradu

(IlMinuto) – Casteddu, 21 de su mesi de martzu - Una petitzioni indiritzada a su Comunu e a sa Provìntzia de Nùgoro po torrai a donai sa vida, afortiendi e amodernendi, a is cumpartus produtivus vocatzioni de su territóriu barbaricinu. Est custu s'iscopu de s'arregorta de firmas promòvia de a Manca pro s'Indipendentzia, lúnis passau in Nùgoro, in d-una cuferéntzia de imprenta. "Is arragus orgànicus chi ferrint a s'ecunumia nostra depint essi afrontaus de fundamenta. [...] Po no tzèderi a petus de s'invasioni de is Megamercaus italianus i europeus - pretzisat s'organizatzioni de sa manca indipendentista - depeus cumentzai a fabricai un'industria de is produtzionis sardas, chi acotzit a un'ecunumia indipendenti e rispitosa de s'ambienti e de is resossas suas". Su coru de proposta de aMpI tenit comenti pernu s'avaloramentu de s'agroalimentari, de sa pastoria, de s'artesanau e de su turismu, cumpartus chi, po sa manca indipendentista, si acotzaus ant a permiti de torrai a cumentzai a creai ecunumia e traballu. Diversas e cumpostas is preguntas fatas de is rapresentantis de s'organizatzioni: "Pedeus chi asuba de is terras cívicas de Pradu bengat fatu unu Tzentru de sa Soberania económica, torrendi a donai a sa comunidadi [...] is terras arregalladas in modu illegali de su Comunu de Nùgoro a s'Esercitu italianu po su fàbricu de una caserma chi pesat in is buxacas de is tzitadinus nugoresus e de totus is Sardus. Pedeus chi in su cumprimentu, in sa manutentzioni e in sa promotzioni de su Tzentru nou s'impitint is 24 milionis de eurus de dinai públicu finatziaus po fabricai sa caserma militari in Pradu. Chi s'impitit parti de cuddus 40 milionis de eurus assignaus de sa Regioni a is areas industrialis in crisi de su tzentru Sardigna [...] chi su terrenu cívicu no bengat istrupiau, fadendi cunformamenti istruturas chi no guastint su logu […]. Pedeus chi su Tzentru de sa Soberania económica siat fatu cun s'atentzioni giusta". Po pigai prus scedas telefonai a su númeru: 328949906