“Un sorriso oltre le sbarre”: de Buoncaminu un'abratzu simbolicu a totus is féminas presoneras

‎(IlMinuto) – Casteddu, 8 de su mesi de martzu - Fait 3 annus “Un sorriso oltre le sbarre”, sa proposta promòvia de s'assótziu "Socialismo Diritti Riforme" nàscia po sensibilitzai a s'opinioni pública asuba de sa situatzioni de is féminas presoneras. Partner de s'atopu po s'editzioni de su 2012 est sa setzioni casteddaia de sa Fidapa. In s'atóbiu aprontau in Buoncaminu, po afestai s'8 de su mesi de martzu, festa de sa fémina, dógnia presonera at a arriciri un pachixeddu cun prodotus po si sciacuai e po si pigai cura de sei. "Sa Festa de sa Fémina - cumentant is aprontadoris - tenit po nos unu sinnificau particulari prusatotu ocannu. No si ndi podeus difatis iscarèsciri ca su 2011 est stétiu aflitu de su suìcidiu de una fémina própriu in su presoni de Buoncaminu, su primu in s'istória de custu Istitutu Penitentziàriu". Sa trazédia de sa morti at fertu agoa puru su 2012, chi at biu sa morti de una giòvona po overdosi a pagus oras de ai torrau a tenni sa libertadi sua. "Cun is féminas presoneras de Buoncaminu - sighit sa nota de imprenta - boleus abratzai im modi simbolicu totu sa realidadi tribulada de is féminas chi s'agatant aintru de is Istitutus de Pena de sa Sardigna".