Tzínema: a sa VII editzioni s'Asui Film Festival

(IlMinuto) – Casteddu, 29 de su mesi de fiàrgiu - Castiat a sa Romania sa VII editzioni de s'Asùni Film Festival in programma de su 2 a su 4 de su mesi de martzu. A pustis de is editzionis passadas, dedicadas a Scandinavia, Cuba, Kurdistan, ex Jugoslavia, Africa e Argentina, difatis, ocannu sa manifestada at a firmai s'ogu suu asuba de un'àtera realidadi tzinematogràfica prontuda e connota pagu de su públicu, sa rumena. Su menù no at essi arricu scéti de proietzionis, ma puru de atopus cun atoris e registas, butegas e unu númeru mannu de àterus avenimentus.Agoa de sa diri de "anteprima", fissada po gióbia 1 de su mesi de martzu in Tàtari, s'Asui Film Festival at a proietai is pellículas suas in Asui, Sèdilo e Aristanis. A aprontai sa manifestada est s'assótziu Su Disterru, cun s'apógiu de s'Assessorau a sa Pública Istrutzioni, Benis Culturalis, Informatzioni, Sport e Ispetàculu de sa Regioni Sardigna, de s'Assessorau a sa Cultura de sa Provìntzia de Aristanis, de is Assessoraus a sa Cultura de is Comunus de Asui, Sèdilo e Aristanis e cun su contributu de su Consortziu turusticu Sa Perda 'e Iddocca.