Presonis: "Sardigna: Caienna de s'Itàlia"

(IlMinuto) – Casteddu, 24 de su mesi de fiàrgiu – "No iat a bolli ca cun s'arreghescia de is presonis nous si fessat tentendi de fai de sa Sardigna una Caienna noa de s'Itàlia". Fueddu de Mauro Pili, deputau de su Pdl chi denuntziat in is pàginis de "La Nuova Sardegna" unu pranu cuau de su Ministeru: su trasferimentu intru de s'annu de 2000 presoneris e prus de is presonis italianus a cussus sardus, bécius e nous. Si fessat aici , difatis, no iant a bastai is istruturas penitentziàrias noas fabricadas in Sardigna (Tèmpiu , Aristanis, Tàtari, Casteddu) po acasagiai is presoneris chi giai ddoi funt e is presoneris in apróliu, cun s'arriscu ca is bécias iant a abarrai obertas cun sa genti a stibu chi no at torrai a prus pagu. Su trasferimentu de pagu diris fait de 100 presoneris lompius de sa penísula in Sardigna parrit cunfirmai s'idea ca su Pranu Istraordinàriu Presonis cunfirmit s'istóricu rolu de sa Sardigna comenti "presoni naturali" po mori de s'"insularità", e ddi donit su nou de vàlvula de sfogu de sa cunditzionis mala meda de is presonis.Berus est ca su DAP (Dipartimentu Aministratzioni Penitentziària) ddu iat giai nau tempus fait cun d-una circulari de su 2009 chi afirmàt ca "is presoneris sutapostus a regimi de presoni ispeciali depint essi incotaus aintru de istitutus fatus scéti po issus, chi s'agatant preferibilmenti in logu de ísula". "Obietivu: impitai sa Sardigna comenti terra de cunfinu". Fueddu de Mauro Pili.