S'acontéssia de Rossella Urru in Consillu regionali. Zuncheddu (Indipendentistas): "Mudesa mala de is istitutzionis"

(IlMinuto) – Casteddu, 27 de su mesi de gennàrgiu - A tres mesis e prus de su secuestru s'acontéssia de Rossella Urru imbucat fiamenti in Consillu regionali. A portai sa chistioni de su ratu de sa coperanti sarda de su Comitau internatzionali po s'isvilupu de is pópulus de unu campu saharawi po disterraus in Algeria est stétia una motzioni presentada de su consilleri regionali Claudia Zuncheddu (Indipendentistas), arraxonada ariseru in àula. Sa motzioni pedit a su Presidenti de sa Regioni, Ugo Cappellacci, de fai calencuna cosa atressu de "atzionis apretosas" trisinendi a sa diplomatzia e a is organizatzionis internatzionalis (Ministeru de is Ésterus, Onu, Coperatzioni internatzionali e Ong). "A oi - scririt Zuncheddu - is istutzionis regionalis, apitzus de su ratu de Rossella Urru, funt abarradas in d-una mudesa légia meda".