No Radar: sighit sa batalla. Cras atopu in Crabas. Is comunicaus de is Comitaus e de aMpI

(IlMinuto) – Casteddu 27 de su mesi de paschixèdda - Analizai sa chistioni a pustis de s'arreusa de sa Guardia de Finanza de ponni is radar in Capo Sperone, Capo Pecora, Ischia Ruja e in s'Argentiera e cumentzai pranus de lota nous. Cun custu obietivu is Comitaus No Radar Sardigna s'ant a atopai cras in Crabas, a is 17.00 in su Tzentru de bia Tharros. "S'arreusa de sa Guardia de Finanza de ponni is radas in 'Capo Sperone', 'Capo Pecora', Ischia Ruja e s'Argentiera - si ligit in d-una nota de imprenta - e su sceberu de ddus ponni in is farus bécius de sa Marina Militari de sa costera otzidentali de s'Ísula, oberrit fentanas noas asuba de s'arretza radar Sardigna. Su sceberu de is giassus nous difatis […] parrit afastiai s'abisóngiu de ponni in calencunu logu is radar giai pigaus de sa GdF e allogaus de s'Almaviva spa". Sa batalla contra a su fàbricu de is radar at a sighiri. "Su Comitau NOradar 'Capo Sperone' - pretzisat unu comunicau - pentzat chi siat stétia binta una batalla chi ammostat su profertu de sa mobilitada populari ma, ma arrespetendi su slogan chi cussus etotu ant mandau ainnantis 'No radar ni innoi ni in àteru logu', pentzat de depi acastiai e de depi sighiri sa batalla e sa mobilitada a su costau de is Comitaus e de is Tzitadinus chi funt gherrendi contra a is radar nous e bécius". Apitzus de sa chistioni at fueddau puru a Manca pro s’Indipendentzia. "Si oi - scririt aMpI - eus a atzetai custa comenti una bitória eus a fai su giogu pagu bellu de is aministratzionis, de is personalidadis istitutzionalis e de is certadoris medas de is radars chi ant mandau ainnantis unu giogu chi no ponit comenti coru de sa chistioni sa soverania natzionali [...]. Is radar militaris at a benni difatis fabricaus poita bius,  de is capus mannus de sa Nato, comenti netzessàrius : 'Capo Caccia' in S'Alighera, 'Capo San Marco' in Aristanis, 'Capo Sandalo' in s'ísula 'e Sàntu Pèdru e in 'Capo Sant'Elia' in Casteddu".