Parchegius in Cuartu: billetu chentza seguresa de arrépiu po is residentis

(IlMinuto) – Casteddu, 21 de su mesi de ledàminis - Tiras asullu scuru in is parchegius de su campusantu, in bia Turati, in via Sicilia e in àteras arrugas. Su pranu de arrépiu nou de Cuartu Sant'Aleni bófiu de s'aministratzioni Contini est acanta de bessiri e unu númeru mannu de tzitadinus cuartesus ant a depi pagai puru po parchegiai. "Po is residentis de is tretus A e B (duas areas de su tzentru de Cuartu) - si ligit in su giassu de su Comunu - est giai possíbili dimandai s'abonamentu chi at a permiti de parchegiai in is tretus grogus fatus aposta. Su billetu at a permiti puru de si frimai in su meigama e a su noti (de sa una fintzas a is 9.00 de sa diri infatu) in is tiras 'asullu scuru', chentza de spendi de prus, fadendi perou ecetzioni de is pagus arrugas chi tenit travigu meda". Su chi est craru est ca chini tenit su billetu no at a tenni nisciuna seguresa a manginu de agatai parchegiu. Ant a pagai su billetu chenza de tenni sa seguresa de arriciri su serbítziu. Su númeru de is areas de arrépiu "grogas" po is residentis est difatis prus bàsciu de su númeru de is famílias (no s'at a podi difatis pigai prus de unu billetu a família). Po is piciocus de sa Aipa spa - sa sotziedadi chi at bintu sa gara - custu no est un'istrobu mannu meda. A sa pregunta, "Ita fatzu deu, meri de su billetu, si su mangianu no agatu parchegiu in is tretus 'grogus'?", arrespundint cun frimesa: "Podit sèmpiri parchegiai in is areas chi funt a gratis". Gràtzias! Custu si podiat fai puru primu. E chentza de pagai nudda.