Presonis. Sdr: “Negaus is arrestus domitziliaris a sa fémina príngia de duus gemellus”

(IlMinuto) – Casteddu, 2 de su mesi cabudanni – V.D., sa fémina serba de 28 annus, mama de cuàturu pipius de 8, 6, 5 e 3 annus e príngia de duus gemellus, est sèmpiri inserrada in su presoni de Buoncammino, in Casteddu. Ddu fait sciri Maria Grazia Caligaris, presidenti de s'assótziu Socialismo Diritti e Riforme. "Su magistrau de Latina - acrarat Caligaris - at giudicau su stadu de ingraidéntzia cumpatìbili cun sa presonia neghendi is arrestus domiciliaris. Unu determinu in contrastu su sensu de umanidadi". "In is cidas passadas - precisat sa rapresentanti sotzialista - sa fémina est stetia arrecoverada in s'ispidali San Martino de Aristanis po mori de un'amaletzu de strumadura". Imoi sa fémina s'intendit mellus, ma - precisat Caligaris - "est in contrastu cun su sensu de umanidadi unu provedimentu chi negat una cunditzioni de impresonamentu prus pagu grai a una personi chi no at bociu, no at spaciau droga, no scutu o violentau a nemus, ni est combutu cun grupus mafiosus".