Galsi, aMpI: “Un’àtera faina po colonitzai a sa Sardìnnia”

(IlMinuto) – Casteddu, 16 de su mesi de cabudanni - "Un'àteru sdorrobatóriu económicu, ambientali e culturali chi fait de sa terra sarda un'àrea de serbítziu profetosu po su capitalismu italianu i europeu, biu ca una cantidadi manna de su gas chi at a benni abiaxau de sa Galsi at essi de propriedadi russa". Aici su Diretivu Políticu natzionali de a Manca pro s’Indipendentzia fueddat de su metanodotu Galsi in d-unu documentu arricu de datus fatus connosci in is diris passadas. Un'"oru mostruosu e longu meda" - acrarat aMpI - chi atravessat s'ísula po 272 chilómitrus", de "Porto Botte a Terranòa. Un'operatzioni de propaganda acotzada de Confindustria Sardìnnia ca cunsiderat su Galsi comenti un'"ocasioni istórica" po s'isvilupu de su traballu in Sardìnnia. Ma - pretzisat su documentu de s'organizatzioni de sa manca indipendentista - "de beru e cuncretu ddoi funt scéti is angarias, is atentaus voluntàrius a s'ambienti, a su paisàgiu, a s'ecunumia e sa cultura. Seus a faci de un'àtera faina chi nascit de su colonialismu italianu po ingrussai s'isvilupu suu e cussu de s'Europa a is pabas de sa terra nosta destinada s'impitu de conduta. Una faina chi bit sa Regioni Autónoma de Sardìnnia e is políticus italianistas conis de custu àteru atu de colonizatzioni".