“Avisaus s’Assembrea generali de is indipendentistas”. Sa proposta de unu grupu de militantis a su movimentu

(IlMinuto) – Casteddu, 19 de su mesi de cabudanni - "Sa divisioni de su movimentu aintru de unu númeru mannu de organizatzionis sèmpiri prus mannu, fatu de partidus, movimentus, assótzius, grupus medas e individualidadis, no permitit [a issu etotu] de influiri in sa vida política de s'Ísula po ndi podi conditzionai is sceberus e ndi decídiri su tempus benidori". Est custu su pensu chi at fatu movi a s'Assótziu Zirichiltaggia, a s'Assótziu a sa Nuraxia e una fibera de militantis a firmai e a fai connosci sa "proposta de avisu de s'assembrea generali de is indipendentistas". Su documentu - primu firma Giovanni Fara - "lamat a totus is indipendentistas a aderiri a custu atopu po donai cumentzu a unu caminu fatu impari, unu caminu aundi totus is chi participant tengant sa mantessi dinnidadi e legitimidadi a espressai is ideas insoru e fai is propostas insoru". In su trastempus su caminu de convergéntzia intre is organizatzionis políticas indipendentistas sighit. Domínigu chi benit in Aristanis est difatis prevìdiu un'atopu cun sa participatzioni de aMpI, Irs, Paris e ProgReS.