Traballu: Is otu Provìntzias a sa Regioni: "Stabilitzai debressi is precàrius Cesil e Csl"

(IlMinuto) – Casteddu, 7 de su mes'e argiolas - "Mancai ddoi siant stetius diversus cumbidus biu s'arribu de sa scadéntzia de is cuntratus de is traballadoris de is Csl e de is Cesil previdia po su 31 de su mes'e austu chi benit, sighit sa mudesa de sa Regioni asuba de is propostas de stabilizatzioni presentadas su 30 de su mes'e martzu passau". Est cantu denuntziant cun d-una nota de imprenta scrita totus impari is assessoris de su Traballu de is otu Provìntzias sardas. In Sardinna difatis bona parti de is traballadoris de is serbítzius po su traballu - Cesil, Csl e Agentzias de isvilupu - no tenit difatis un'impreu seguru, ma bivit po annus meda de precàrius. Is otu assessoris - precisat sa nota - "torrant a pediri chi s'assessorau Regionali a su Traballu fatzat sciri cun craresa e debressi cali siat s'orientamentu operativu, po ponni fini, po sèmpiri, a su stadu de precariedadi de is serbítzius assegurendi in su mantessi tempus s'amparu de is professionalidadis e de is traballadoris chi traballant in su territóriu ponendi in pràtiga sa lei regionali 20 de su 2005".