Protzessu Portovesme srl: arrefudus toscus asuta de sa pratza de s’ispidali Businco. Sit in a fac’e su Tribunali de Casteddu

(IlMinuto) – Casteddu, 13 de su mes'e argiolas - At a sighiri su 27 de su mes'e Casteddu su processu cun ritu crutzu a su responsàbili de su sistema de gestioni ambientali de sa Portovesme srl e a sa responsàbili de sa gestioni arrefudus de su mantessi istabilimentu, acusaus de ai decidiu s'interramentu abusivu de deximilla metrus cubus de arrefudus industrialis de s'azienda - 15.000 tonnelladas de arrefudus toscus e noxilis - in is tretus Sèttimu, Serramanna e asuta de su pillu de s'istrada de s'ispidali Businco de Casteddu. Sèmpiri in Casteddu, ma po su 10 de su mes'e totussantus, est fissada s'udiéntzia de una segunda parti de su mantessi protzedimentu. Ant essi imputaus unus cantu de traballadoris de s'azienda Tecnoscavi e unu sótziu de sa Tecnochem. "Sa Portovesme srl - at cummentau su consilleri provintziali Angelo Cremone - at impestau meda e sighit a impestai. Est responsàbili de una de is arrovesas prus grais: una parti de is aremus funt stetius postus puru in sa pratza de s'ispidali oncologicu". In coincidentzia cu s'udiéntzia de ariseru su cumitau "Carlofortini preoccupati" at aprontau un'àteru sit in de protesta a fac'e su Tribunali de Casteddu. "Su cumitau cívicu - at acrarau su rapresntanti de is 'Carlofortini preoccupati' Antonello Repetto - circat de si bati contra a sa 'presunta' impestadura. Naru presunta poita is amministratzionis comunalis ignorant sa chistioni, poita ddoi est unu turismu e duncas custas cosas est mellus a no ddas biri e a no ddas nai". Aurora Pigliapochi de Sardigna Natzione at partecipau a fac'e e su Tribunali cun su manifestu de su referendum regionali de su 2006 contra a s'importazioni de aremus industrialis. "Addolumannu custu referendum - at precisau sa rapresentanti indipendentista - est falliu poita totus is partidus furiant unius in sa lota contra su cuorum. Oi a pustis de ses annus eus ammuntonau un'àtera cantidadi manna meda de aremus po fai arrica sa Glencore cun su ricatu de is postus de traballu. Ma 500-600 postus de traballu balint sa vida de unu territóriu intreu, de is pipus e de is operàjus etotu?".

Ringratziaus a Mario Flore po s'ai donau sa fotografia