Cinc'annus de s'Operatzioni Arcadia. Sabino (aMpI): "Simpli repressioni colonialista"

(IlMinuto) – Casteddu, 12 de su mes'e argiolas - "Trasmìtiri a sa genti su cuncetu ca s'indipendentismu est unu movimentu políticu criminali. Est custu su motivu chi at biu dexi militantis de a Manca pro s’Indipendentzia postus in galera in su 2006. Est custu su motivu chi bit a Bruno Bellomonte, dirigenti natzionali de a Manca pro s’Indipendentzia, a is arrestus cun arreghescias chi no tenint ni conca ni peis". Cun custus fueddus Cristiano Sabino, boxi de a Manca pro s’Indipendentzia, at ammentau s'Operatzioni Arcadia a cinc'annus giustus giustus de s'acontéssia, in d-unu sit in aprontau de sa manca indipendentista ariseru a mangianu a fac'e su Tribunali de Casteddu, in pratza Repúbbrica. S'11 de su mes'e argiolas de su 2006 dexi tra militantis e dirigentis de aMpI beniant arrestaus de sa Diretzioni distretuali contr'a su terrorismu de Casteddu cun d-unu spricullitu ghiau de su pm Paolo De Angelis: in cussa chi est connota comenti s'Operatzioni Arcadia. "Dexi indipendentistas - at precisau Sabino - ant passau un'annu de vida a is arrestus chentz'e connosci su motivu. Su processu no est stetiu mai fattu, no s'est mai tentu nimancu su rinviu a giudítziu, ma est berus puru ca su spricullitu no est stetiu mai archiviau. Seus a fac'e de una repressioni colonialista crara crara". A sa manifestada ant pigau su fueddu puru rapresentantis de Sperantzia de Libertadi, Sardigna Natzione, Cobas Iscola e Colletivu anticapitalista sardu.