"Cabai is manus de is serbítzius púbblicus". Cras in Isili sa firma po su protocollu intre Provìntzia de Casteddu - Inps

(IlMinuto) – Casteddu, 27 de su mesi de argiolas - "Sa Provìntzia de Casteddu non at a permiti chi is tzitadinus de is territórius chi funt prus atesu abarrint chena de serbítzius púbblicus". Cun custus fueddus s'assessori Provintziali de su Traballu, Lorena Cordeddu, cummentat su protocollu de acórdiu po fai su primu Tzentru integrau po is Serbítzius po su Traballu: un'istrutura chi at a ponni impari is serbítzius Csl cun cussus garentius de s'Inps.

S'acórdiu at essi firmau cras a is 11.00 in su Tzentru Serbítzius po su traballu de Isili. Ant a firmai su documentu sa Presidéntzia de sa Provìntzia de Casteddu, sa Diretzioni regionali de s'Inps e is Sindigus de is Comunus interessaus.

"Su progetu - si ligit in d-una nota de imprenta - nascit cun s'intentzioni de amparai is serbítzius púbblicus in is territórius. Est su casu de is tzentrus chi s'agatant prus atesu de is sedis Inps, chi arriscant de serrai po mori de is taglius fetianus de su Guvernu tzentrali"